На Вознесіня в Тернополи освятят храм в лемківскым стилю

Недавно, 22. мая проходило освячыня грекокатолицкой церкви свв. Кірила і Методия в Івано-Франківску. Такой вшытка тамтышня громада, в тым і парох о. Анатолий Дуда-Квасняк, то переселенці з Лемковины, або іх потомкы. До освяченой церкви, котра збудувана в лемківскым стилю, ходят і православны, і грекокатоликы, бо лемківска церков лучыт вшыткых.

Іщы єдна церков в лемківскым стилю буде в четвер освячена в Тернополи при улици Львівскій 13 (парохом єст о. Василь Шафран). Як і в Івано-Франківску, так і ту уж скорше одправляла ся Св. Літургія, але аж тепер будову докінчено, што буде причынком до одслужыня великого чыну освячыня храму. Подія заплянувана єст на 9. червця/юнія, на свято Вознесіня Господнього, бо і сам храм ― то Вознесеньска церков, а зачне ся вшытко о 11.00 годині. Пак, по архієрейскій літургіі вызвучыт концерт, в якым будут брати участ хоры і ансамблі, співаючы лемківскы пісні, та другы выконавці.

Перша церков в Галичыні, представляюча лемківскій архітектонічний стиль, была збудувана в Львівскым скансені «Шевченківскій гай» в 1992 році. Храм свв. Владиміра і Ольгы єст точно скопіюваний з церкви, поставленой в 1841 році в селі Котань. Храм не єст лем скансеновым експонатом, понеже діє як церков, будучы тіж місцьом стріч і культурных імпрез. І в самым Кыйові найдеме русиньску деревяну церков з Підкарпатской Руси – храм Покровы Пресвятой Богородиці – в скансені «Пирогово».

Подібну до выже спомненых, т.є. і культурну функцию, мают тіж другы церкви і каплиці в місцях, де жыє більше переселенців з Лемковины, або іх потомкы, напр. в модерній церкви села Пастуше (Чортківскій район Тернопільской области), в котрій того рока одбыл ся фестіваль лемківскых коляд.