На трасі Будапешт – Вашінґтон

Доналд Трамп выграв презідентьскы выборы, і в часі писаня коментаря є Володимір Зеленьскый першый раз од початку повноформатовой войны у 2022-ім році в Будапешті. І ку навернутю прав мадярьскій меншыні на Підкарпатю не было іщі од року 2014 ближе.

20-го януара 2025-го року Доналд Трамп стане 47-ым америцькым презідентом, і по штририрічній перерві верне до Білого дому. Без того, жебы сьме коментовали, што од нього мож чекати, є ясным ділом, же мадярьскый премєр Віктор Орбан може мати так само якесь чутя перемогы.

Підтримовав Трампа, навщівив го і в часі, коли не быв презідентом, но і днесь прятельскы контакты тых двох політічных лідерів можуть принести, про Віктора Орбана і Мадярьско, бенефіты. Доналд Трамп якбач бенефіты од Мадярів потребовати не буде.

І кедь Трамповы слова, же до 24 годин закінчіть войну на Україні, майже нихто не брав серьйозно, ани автор коментаря, фактом є, же закінчіня войны на Україні, і є абсолутно єдно, ці воєньскы або діпломатічно так, жебы Україна з того вышла найліпше як лем бы ся дало, без такой могучости яков суть Споєны штаты, не буде можливе.

Володимір Зеленьскый собі то усвідомлює. І не робить з того по америцькых выборах жарты. Трампово приобіцяня „мір посередництвом силы“, котру може Вашінґтон додати, му припомянув такой, як было ясне, же Трамп вертать до Білого дому.

Так само мож проґнозовати, же Віктор Орбан вдяка своїм щірым односинам, і дакотрым сполочным політічным поглядам, буде про (старо)нового америцького презідента єдным із ключовых партнерів у Европі. І є цалком можливым, же вєдно із цілов свойов новов европсков політічнов силов під назвов Патріоты про Европу.

Но і то є момент, котрый дакус мінить обставины на гріску, на котрім уж довго біжыть гра о народностны права Мадярів на Підкарпатю.

Днесь має Віктор Орбан іщі єден тромф. І тым є приятельство з Доналдом Трампом.

Кедь дотеперь з Будапешта было чути лем о тім, же Мадярьско буде блоковати інтеґрацію Україны до западных штруктур, днесь має Віктор Орбан іщі єден тромф. І тым є приятельство з Доналдом Трампом. Презідентом країны, од котрой помочі барз є залежна сітуація на Україні.

Покля Віктор Орбан не буде успішный із своїма пожадавками односно народностных прав у Києві, а в Бруселі далше будуть грати театер, же то не видять, або же то не перешкаджать, Орбан теперь буде годен бісідовати о тій проблематіці і зо шефом Білого дому, а од народностных прав на Україні може быти залежна і поміч про Україну.

І кедь ся днесь над тым можеме засміяти, і повісти собі, же то бы предсі не могло огрозити поміч Вашінґотна Києву, быв бы єм з тым сміхом дакус стриманішый.

У Доналда Трампа можеме найти міліон неґатівных свойств, но Доналд Трамп не забуде, хто далше його підтримовав, і кедь быв штири рокы мімо уряду. Хто ся з ним стрічав, і кедь не мав власти у своїх руках, быв „лем“ експрезідентом.

Зато є барз можливым сценарьом, же много діл у Европі ся з Америков буде рішыти і на трасі Будапешт – Вашінґтон. А на тій трасі ся може будуть рішыти і народностны права.

Віктор Орбан выграв. Має то лем єдну хыбу. Віктор Орбан і його владный кабінет все бісідує і рішыть лем права Мадярів на Україні. Было бы добре, кебы і в Будапешті усвідомили собі, же права народностных меншын мусять быти універзалны, не лем про выбрану ґрупу.

Іншак нам може втечі далшый влак, котрый бы міг быти історічно прінціпіалный, а мы зістанеме там, де сьме на Україні од року 1991, або то буде іщі гірше. А притім то колись были вшытко нашы сполочны угорьскы штрекы.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.