На тот Новый… – «Горовить Пряшів» – пятниця, 18.10 год.

«Дай Боже щестя, на тот Новый Рік, на тото Боже народжыня…» – все ся задумую, што мало бы быти перше, кєд то стародавны лемківскы вінчуваня. Но бо кєд колиси ся перше празднувало Рождество, то пак был Новый Рік. За старым стильом ци юлияньскым календарьом (як хто волит).

Но і кєд тепер чую такы вінчуваня, так уж сам не знам, ци дахто сой чергу мінил, ци дашто злі понимам. Незалежно од того, днес просиме вас на (першый) новорічный «Говорить Пряшів». Но бо кєд пряшівскы братя святкуют уж такой вшытко по новому, то і мы – кус потрачены – тіж часом мусиме тото брати до увагы. Не єм за тым, жебы на Лемковині ввели новый календар, але кус сме зданы на тото, што святкує ся більшыма в ночы з 31. ХІІ на 1. І.

Зато будме вірны традициі. Будме згідны і зо своім внутрішнім пониманьом світа. Того желаме вшыткым Русинам і тым проґресивным, і тым меньше – більше ортодоксийным. Лем знайме єдно, же то лем календар, же то лем чыісы рахуваня, што о ничым не пересвідчают.

«Подай Біг…»