На щестя, на здравля, на тот Новый Рік!

Свята, свята і по святах. Але то лем єден праздник з трьох, як стоіт в нашій коляді. Другій же праздник то св. Василия, што уж заран. Попереджат го наша Маланка.

З ньом як раз хочеме Вас сердечно поздравити. Витаме «старый» Новый 2020 Рік. Най буде серенчливый, ачий ліпшый од минулого… Іван Русенко все нас повчыт з тым, як треба ся вести. Дякуєме Учытельови за актуальны вінчуваня. Прилучаме ся ґу ним – редакция лемківскых медий – ЛЕМ.фм+.

Дай Боже щестя, здоровя –
В тым Новым Року!
І най никого не коле –
В ямці ни в боку.
Най каждому в каждым ділі
Все добрі іде
І най в згоді жыют нашы
Лемкы сусіде.
Най ся нашы Лемкы множат –
Як Бог приказал,
Жебы нас уж з нашой мапы
Ник не вымазал!
І най каждый ґазда має
Добру ґаздыню,
І най ся му вшытко родит –
Хоц на каміню.
Та най нашы братя не пют –
Виски ни руми,
Най ім Бог даст в Новым Року
Веце розуму.
То не буде до выпиткы
Тельо оказий,
І каждый сой зашпарує
Дакус пінази.
І Дай Боже, жебы было
Ліпше на світі,
Жебы Руснак мал што істи
В зимі і в літі.
А лемківскым «меценасам» –
Што друт з нас грошы,
Брюха мают, попивают –
Жыют в роскошы,
Най же товды, як народу
Треба помочы,
Задом ся не обертают –
Не жмурят очы.
Нашым львівскым редакторам –
Терпеливости;
Най ся не жрут медже собом –
Як псы на кости. (…)
А де людска сила, розум
Нич не поможе,
То уж поможе подля волі –
Великій Боже.
Од повітря, глада, огня,
Воды і війны –
Хран нас Боже! А дай нам
Часы спокійны.

Іван Русенко, «На 1931 Рік»