На розвиток Пряшівского краю піде 180 міліонів евр

На теріторіалный розвиток Пряшівского краю піде майже 180 міліонів евр, інформує Одділіня комунікації Пряшівского самосправного краю (ПСК). Перерозділили ся меджі першых 85 проєктовых замірів із різных областей.

Уможнять наприклад выбудовати Талентцентер, інтеліґентны автобусовы заставкы, центры інтеґрованой здравотной старостливости ці містьскы яслі. О розділіню фінанчных средств вырішыла 6-го октобра 2023-го року Рада партнерства ПСК, котрой задачов є забезпечіти ефектівне черьпаня еврофондів у новім проґрамовім періоді.

Ідеме на сістему, котра фунґує в Польщі

Представителі державной справы, реґіоналной і містной самосправы, як і далшы ключовы партнеры із субреґіонів Спіша, Шаріша і Земпліна, конкретно подникательскый, гражданьскый і академічный сектор, схвалили 85 проєктовых замірів у 29-ох областях, і меджі них розділили майже 180 міліонів евр.

Із того 153 міліонів представлює дотацію Европского фонду реґіоналного розвитку. Іде о першу частку фінанцій із цілковой сумы 250 міліонів евр алокованых про ПСК в новім проґрамовім періоді в рамках Проґраму Словакія.

„Помалы набігуєме на сістему, котра фунґує в Польщі. То значіть, же о черьпаню еврофондів будуть вырішовати реґіоналны штруктуры, значіть теріторія. Із 16 процент актуално діставаме ся на 19 процент еврофондів, котры має в компетенції высшый теріторіалный цілок. Но іщі все сьме далеко од помыселных 44 процент польскыx еврофондів,“ повів почас засіданя Рады партнерства ПСК пряшівскый жупан Мілан Маєрьскый.

Наперек тому за словами председы ПСК ся іде допереду, што є добра новина про Пряшівскый край і його жытелів. „Чім веце маєме грошей в реґіонах, тым векшый і скорішый є розвиток,“ повів далше Маєрьскый.

Інвестіції до розмаїтых областей

Першы інвестіції бы мали іти до области школства, конкретно до 14-ох проєктовых замірів, до здравотництва, де іде о три проєкты, як і до соціалных служеб ці розвитку транспорту, де є схваленых 20 проєктів, а наконець і до турістічного руху, причім в тій области іде о 35 проєктів.

На розвиток транспорту в реґіоні Спіша і Шаріша схвалила Рада партнерства ПСК в І. етапі заміры за майже 55 міліонів евр. Грошы мають іти на будованя, модернізацію і реконштруцкію драг ІІ. і ІІІ. класы, а так само на розвиток утримательного інтеґрованого транспорту, в рамках чого будуть куповати ся еколоґічны автобусы, будовати мултімодалны транспортны теміналы і інтеліґенты автобусовы заставкы.

„Ціклотранспорт і ціклотурізм підпорив ся алокацйіов 11 мілінов евр, головно іде о добудованя меджінародной біціґльовой стежкы Eurovelo 11. Но в рамках турістічного руху сьме напрямили інвестіції і до розвитку културной а природной дідовизны в околіці Домашы ці на теріторії Полонин, значіть до реґіону Вышнього Земпліна,“ інформовав Маєрьскый.

„Самособов, далшов нашов пріорітов у ціклістіці і турізмі суть єднозначно Полонины, де піде 15 міліонів евр, з того 6 міліонів на выбудованя трасы Poloniny Trail, доповнив председа ПСК.

Думать ся і на соціалну сферу

В соціалній сфері фінанції выділили ся на підпору містьскых ясель, добудованя і оправу двох домів соціалных служеб і пятьох домів крізового бываня, і то в цілковій сумі 11 міліонів евр. В рамках школства суть грошы схвалены на зліпшіня освітньой інфраштруктуры на середніх школах, як і на розвиток фаховой приправы і ціложывотной освіты.

Край хоче на своїй теріторії так само выбудовати три новы центры інтеґрованой здравотницькой опікы, причім піде о проєкты за 4 міліоны евр.

Цілкова алокована частка фінанцій про розвиток Пряшівского краю є розділена на веце етап. Зіставать так іщі 100 міліонів евр, о котрых буде знова вырішовати реґіон, а то іщі того року. Подавати проєкты на підпору так будуть мати можливость іщі далшы жадателі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА