На ратунок лабівскым памятникам. На ратунок нашій памяти

Лабова при Санчы то село, якє славне не лем з огляду на велику мурувану церков, близкє положыня до міста, освіченых і знаных селянів, але і за справом єдного з найбільшых памятковых цмонтерів на західній Лемковині.

О тот же теметів, на котрым спочывают поколіня Лабовян, од даякого часу щестливо дбают. Постепенно ведена єст його модернізация і привертаня чести. Яла ся того лемківско-польска ґрупа – тым разом при помочы ґранту реализуваного Лемківскым Ансамбльом Пісні і Танця «Кычера» з Ліґниці.

Перша част за нами

В днях 13.-16. мая в Лабовій на західній Лемковині одбыл ся першый етап – з двох заплянуваных на 2021 р. – варштатів каменярства, полученых з реновацийом памятників на місцевым лемківскым цмонтери. Варштаты, в котрых взяло участ в сумі дванадцет осіб, мали за ціль ратувати памятковый цмонтір, єден з найбільшых в тій части Лемковины.

До спілпрацы при нелегкій фізичній роботі, яка обнимала не лем інвентаризацию, але головно чыщыня і складаня наново некотрых памятників, долучыли Лемкы, потомны выселенців, што прожывают на тот момент м.ін. на Нижнім Шлеску і любушскым воєвідстві. Не бракло і помочы зо страны місцевых.

Варштаты і робота были ведены під оком Шымона Моджеєвского, ведучого Стоваришыня Маґурич, якє од років діє на благо сохраніня камінных памятників і капличок, м.ін. на обшыри Лемковины.

Даякы памятникы были очыщены і зміцнены, зато же горозило ім цілковите знищыня. Ґрупа поправила і вырівнала фундаменты під парома крестами. На поросненым травом і тернином цмонтери повело ся найти елементы порозвалюваных памятників, якы пак были склиєны наново. Одновлены обєкты забезпечено специяльным імпреґнатом для пісковця.

Памятник сам в собі

Цмонтір в Лабовій то єден з найбільшых лемківскых цмонтерів, якому іщы не так давно горозила ліквідация. Щестливо стараньом ЛАПіТ «Кычера» повело ся зобрати фінансовы середкы на його ратуваня і упорядкуваня. Реализация той задачы была можлива завдякы дотациі Міністра Внутрішніх Справ і Адміністрациі.

Кус скорше, ґрупа волонтерів, при спертю ЛАПіТ «Кычера» і Стоваришыня Маґурич, Стоваришыня Лемків і Музею Лемківской Культуры в Зындрановій провела ревітализацийны таборы і збірку жертв на ратуваня тамтышніх памятників.

На лабівскым теметові доднес заховало ся вельо камінных крестів, котры за більше як сімдесят років не были нияк ремонтуваны. Більшіст з них єст міцно пошкоджена. То остатній момент, жебы ратувати материяльны памяткы з давной Лабовой. Што основне, цмонтір сам в собі становит надзвычайну памятку лемківской культуры, не лем в значыню духовой памяткы, але і в значыню сепулькрального кумшту.