На праздник Покровителькы Земпліна пришов мукачовскый єпарха

В неділю 6-го октобра 2024-го року Ґрекокатолицька церьков на Словакії святковала Память чудотворной Клокочівской іконы Пресвятой Богородіці, Покровителькы Земпліна. Проґрам празднованя почав в клокочівскім храмі вже в суботу.

Як інформовав Пресовый центер Кошыцькой єпархії, торжественну архієрейску літурґію в неділю одслужыв кір Теодор Мацапула, мукачовскый єпарха, вєдно з архієпіскопом Кірілом Васильом – кошыцькым єпархом, владыком Міланом Хаутуром – емерітным кошыцькым єпархом, і духовенством.

Владыка Теодор в неділю приговорив ся участным і в проповіді. До Клокочова пришов ку Клокочівскій Богородіці в слідах своїх предків і опередника – владыкы Мілана Шашіка, котрый быв мукачовскым єпархом перед ним. Почас архієрейской літурґії співав катедралный хор із Ужгорода.

На кінцю владыка Кіріл Василь подяковав вшыткым присутным, но головно владыкови Теодорови, котрому подаровав панаґію з чудотворнов Клокочівсков іконов Пресвятой Богородіці.

Праздник Покровителькы Земпліна

Праздник Покровителькы Земпліна быв установленый Декретом Конґреґації про восточны церькви (днесь Дікастерія про восточны церькви), выданым у Ватікані 21-го децембра 2020-го року. Стало ся так на основі жадости втогдышнього пряшівского архієпіскопа і митрополіты Йоана Бабяка і Рады єрархів Пряшівской митрополії при нагоді 350-ой річніці слызіня Клокочівской іконы.

Підпорены были жадостями пріматорів і містьскых заступительств вышнього і нижнього Земпліна, як і писмами Монс. Бернарда Бобера, кошыцького римокатолицького архієпіскопа-митрополіты, і владыкы Ґеорґія Страньского, православного архієпіскопа михалівско-кошыцького.

Клокочівску ікону Папа римскый Франціск 14-го септембра 2021-го року, по архієрейскій Літурґії св. Йоана Златоустого, котрой быв головным служытельом в Пряшові, торжественно коруновав.