На початок шкільного рока – «Говорить Пряшів» – пятниця, 20.00 год.

Пошколены сме. Але не так, як нашы русиньскы діточкы будут ся аж тепер школити. Пришол вересен/септембер. Про єдных смутний час, бо треба брати наплечник і іти маршом до школы. Добрі, жебы то іщы была русиньска школа, або хоц бы вчыли русиньского языка. Того желаме не лем собі, але і Вам. 

Мы же пошколили ся в бардиівскій башті, де проходили наукы журналистичного кумшту. Радийовці і редакторы з радия ЛЕМ.фм довєдна з заслуженыма журналистами з Пряшівской Руси мали нагоду ся дакус повчыти. То добра інформация про тых, котрым не хоче ся іти од найблизшого понеділька до школы. Не така страшна тота наука. Може быти часом і приємні. Не знаючых, о чым то, красні просиме на приватну розповід з нами. 

Конец писаня о ничым. Тепер дознате ся, што в днешнім «Говорить Пряшів» зрыхтували редакторы братиславского радия Русин.фм, якє постійно камаратує з нашом редакцийом. В ефірі нашого радия чуєте хоц-што. Але поучытельных проґрамів про ґрамотных аж так вельо неє. Зато «Говорить Пряшів» то тым більше проґрам для каждого Руснака, якій зможе ся вчыти. Днес в Історичным Календари выслухате про Словацкє Народне Повстаня, а в Нашых (русиньскых) Целебритах про Людвіка Свободу, пізнійшого президента Чехословациі. То лем фалаток того, што найдете в нашым радию днес по 20.00 год. 

Красні просиме з нашой Лемковины на проґрам просто з Пряшівщыны. 

Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.