На Підкарпатю будуть рештавровати замкы

Як інформує протал Новини Закарпаття, Закарпатьска областна рада вырішыла в рамках розвитку турістічного руху на Підкарпатю приділити фінанції на рештаврованя історічных замків в тій области.

На засіданю областной рады быв потвердженый Комплексный проґрам всокочіня і хоснованя памяток културнной дідовизны Закарпатя на рокы 2016 – 2020. Цілково ся в тых роках має в рамках проґраму інвестовати 53 міліонів гривень, што є коло 2,1 міліона евр.

До списку пріорітных памяток, котры потребують рештаврованя дістало ся 9 замків. Головно іде о замок в селі Середнє із 12-го столітя, далше Невицькый замок із 12-го аж 13-го столітя, мукачівскый Паланок із 14-го аж 17-го столітя, Чинадієвскый замок із 14-го аж 15-го столітя, Квасівскый замок із 12-го аж 13-го столітя, замок Нялаб у селі Королево із 12-го аж 17-го столітя, Канков у Вигоградові із 12-го аж 14-го столітя, Хустьскый замок із 11-го аж 12-го столітя і Ужгородьскый замок, котрый ся датує на 11-те аж 14-те столітя.

Як перше має ся теперь вытворити проєктова документація, потім буде слідовати рештаврованя памяток. В рамках проєкту суть приділены грошы і на вытворіня електронічной датабазы тых памяток. Першы грошы на проєкт спомянутого проґраму підуть у 2016 році і буде то конкретно 7,2 міліона гривень, што є коло 285 тісяч евр.

На фотоґрафії замок в селі Середнє.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА