На незаплачіня…

Покы і тоты найвекшы песимісты в остатніх місяцях зачали сліпо віровати, же на Україні ся то десь з вопросом Русинів рушать, бо ту была „ґаранція“ од закарпатьского ґубернатора Ледиду і народного депутата Бушка, же в слідуючім переписі собі Русины будуть годны вызнати свою народность і свій материньскый язык, потім про них мусять быти найновшы інформації з Києва ведром зимной воды выллятым на голову.

В тім чіслі собі можуть тото ледове ведро, котре пробудить і з того найглубшого сна, высмаковати і функціонарі Світовой рады Русинів, котры на конґресі не чули потребу даяк окреме рішати вопрос Русинів на Україні, бо вшытко про них властно было вырішане. Тадь з Ледидом собі місяць дозаду подавали рукы і Бушко особні речнив на конґресі. Не пересвідчів їх ани арґумент, же порожня колонка, де собі жытель може записати народность яку хоче, не є вызнаньом народа і не пересвідчіло їх ани то, же ани Бушко, ани Ледида, не суть компетентны выразити ся к тому, як буде перепис проходити і якый будуть мати його резултаты ефект на україньску леґіслатіву. Вшытко мало быти вырішане до кінце рока…

Но, подля найновшых інформацій не буде. А не буде то вырішане ани на далшый рік. Міністерство господарьского розвитку ініціовало пропозіцію, котров хотіло пересунути перепис населеня на 2016 рік. І кабінет міністрів тоту пропозіцію одобрив. З такым планом якбач ани Ледида, ани Бушко не раховали і є барз чудне, же їх о тім, як тых найкомпетентнішых міністерство не інформовало вчас. Тадь они были „головныма послами“ добрых новин про Русинів Україны. Таку зраду предці нихто не чекав… Фанушкове обох спомянутых репрезентантів державы мусять быти скламаны. На конґресі єдному з них докінце довго ляпкали. Зась ся потвердило, же обіцянкам Україны чоловік годен віровати може так, як і україньской юстіції. Тоты, што на цілу сітуацію смотрили песимістічно, можуть повісти, же мали правду. Але радость з такой правды не тішыть. Бо вєдно з переписом пересувать ся і вопрос рішаня Русинів, котры суть доднесь чуджыма у властнім обыстю.

Самособов, Викторови Януковичови перепис не є потрібный. Державу тримле міцно у своїх руках а было бы нерозумне зробити перепис іщі перед презідентьскыма вольбами. Тадь резултаты бы могли принести чісла народностных ґруп, котры бы, не дай Боже, мали потім даякы пожадавкы. Зато аж 2016 рік. То, же свойов політіков, коли є невалушный зробити тото, што рекомендує Орґанізація зъєдиненых народів і Европска унія, значіть зробити перепис раз за десятьроча, в році, котрый має на кінці чісло єдна, заряджує свою державу іщі на векше дно, як є на тім таке Трінідад і Тобаґо, бо і тото знало зробити перепис з далшыма державами в 2011 році, є вже якбач неважне. Головно, же асоціачный договор вже лежыть на його столі і тинта до пера, з якым бы го Україна рада підписала, є закуплена. Думам, же напосліды маніпуловав з переписом населеня на Україні Сталин. Але тот быв поважованый за діктатора.

Офіціальнов причінов пересунутя суть подля Києва фінанції. Тых на перепис не є доста. Лем вчера єм видів на єднім україньскім сайті, же фірма International Business понукать своїм кліентам інтересны службы. За поплаток вам зроблять візы до Европы але і таку Карту Поляка, або вам выбавлять жытельство Мадярьска. Жытельство „лем за“ 5000 евро. Як при карті, так при жытельстві лем треба выголосити, же ся чуєте быти Поляком або Мадяром, же ваш материньскый язык є польскый або мадярьскый, знати тот язык (ту вірю, же і кібы то не была правда, тых пару речінь, котры будете потребовати перед комісійов, вас за тоты пінязі научать) і потім уж світ на вас чекать одкрытый. З припадного рахунку кліентів спомянутой фірмы, котры собі пожадають о Карту Поляка, або о жытельство Мадярьска, так будеме може мати холем часточны інформації о популації Україны. Будеме знати, кілько є там новых Поляків, ці Мадярів. На тоты офіціалны, і цілковы, але будеме мусити чекати. А може ні до 2016 але до 2021 року, тадь хтось іщі може прийти з думков, же най ся то вже зробить з іншыма державами в реґуларнім терміні. Што є але інтересне, то є то, же быти Поляком, або Мадяром, є на На Україні просте. Стачіть мати грошы і фірма ся о вшытко постарать. Документ о тім, же сьте Русин, документ, котрый вам навеце ґарантує даякы права, вам але нихто не зробить. Хоць Русины бы за то дали вшытко. І так мусять Русины дале чекати. Тішыти їх якбач може лем то, же быти Русином, є, і напрік вынаходливости україньскых компаній, просто на незаплачіня…

Петро Медвідь, Пряшів

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА