На найтяжшым шляку на Лемковині

Може ся здавати, же Бескіды то лем пляскаты гірскы пасма і ниґде не мож си так походити по горах як в Татрах, де убочы сут барже обырвисты, де, як то бесідуют гірскы провідникы, «огріваня влучат ся на плечах». Бескідскы горы, особливо на Лемковині, можут нас кус зачудувати в тій темі. Днес прошу чытачів на коротку, але тяжку прогульку на Лацкову – лемківскій Монт Еверест.

Зачнийме од початку. Лацкова є найвысшым пунктом на мапі Низкого Бескіду по польскій стороні (найвысшый пункт цілого Низкого Бескіду находит ся на Словациі, але там іщы підеме). Часом называют тоту гору «поліцийном», а то з той причыны, же єст она высока на 997 м н.м. Давнійша назва Лацковой была більше подібна до лемківской вымовы і звучала «Вацкова».

Вандрівка на Лацкову не єст долга. Прогульку зачынаме в селі Ізбы, одкаль ідеме дальше на полудне. Нашу ціль будеме видіти по лівій стороні. Покля што наш напрям єст на Перевал Бескід – до него не веде ниякій шляк, ідеме просто головном дорогом од Ізб. На перевал дойдеме в парунадцет минут. Туристичны шлякы, до якых дойдеме, сут там добрi означены. Підме на ліво і тепер будеме іти по польско-словацкій граници. Шляк веде цілый час лісом. З початку буде легко, але пак зачне ся тота част, од котрой як раз «влучыт ся нам огріваня на плечах».

Од Перевалу Бескід до верха Лацковой єст около 2,5 кілометра. Звучыт мало, але вертикальні мусиме поконати аж 353 м! А більше як піл з того маме на остатнім кілометрі. Некотры туристичны книжкы тот фраґмент называют «стіном плачу», а іщы інчы бесідуют, же єст то найтруднійшый шляк в польскых Карпатах поза Татрами. Яка єст правда, тяжко речы, але єдно єст певне – вандрівку на Лацкову запамятаме на долго! На щестя од парох років, од часу коли Лацкова стала ся барже популярном гором, на шляку можеме перейти тот найтруднійшый момент по імпровізуваных сходах.

Лацкова належыт до Короны Гір Польщы, значыт 28 найвысшых верхів вшыткых гірскых пасм в Польщы. Гора єст цілком вкрыта лісом. На верху не будеме обзерати ниякых пейзажів, але можеме собі прибити печатку зо скриночкы в зошыті Гірской Туристичной Одзнакы, жебы удокументувати, же здобыли сме гору.

Як нам буде мало пригід, то можеме продолжати вандрівку і піти дальше червеным шляком до Острого Верха (хоц не так острого як підхід на Лацкову). Там можеме рішыти, ци ідеме дальше червеным по граници (з вариянтом, же зыйдеме до Высовой зеленым шляком), ци жолтым до села Ріпкы. Можливости не бракує!

А о што ходит з тым, же Лацкова єст найвысша лем по польскій стороні? То лем зато, же по словацкій стороні не так барз далеко находит ся кус высшый єй брат (лем о 5 метрів высшый, але уж робит ріжницю). На тот верх выйдеме в нашый наступній вандрівці.

Джерело знимок: Wikimedia Commons
Більше знимок з прогулькы днешньом трасом мож обзерати за мотузком (по польскы): mynaszlaku.pl/kaprysna-lackowa-zdobyta/
Джерело мапы: www.mapa-turystyczna.pl