На Многы і Благы Літа Владыко!

Днес, 14. серпня, Высокопреосвященнійший Кыр Адам, Архієпископ Перемышльскій і Новосандецкій кінчыт 89 років.

Владыка Адам (Александер Дубец) народил ся 14. серпня 1926 рока в лемківскым селі Фльоринка на західній Лемковині. В час ІІ Світовой Войны вчыл ся в Украіньскій Учытельскій Семінариі в Креници. До 1960 рока был студентом Православной Духовной Семінариі в Варшаві, а пак в 1964 році закінчыл студиі на Християньскій Богословскій Академіі в Варшаві.

В 1965 році был рукоположений владыком Юрийом (Кореністовом), а пак направлений до душпастырской послугы на Лемковину до села Высова і до Кальникова. Од 1966 рока был парохом саноцкой парафіі та деканом саноцкого деканату.

30. січня 1983 рока был хіротонізуваний в сан єпископа, остаючы вікарным владыком варшавской єпархіі – товды, як єпиской люблиньскій. З дньом 29. вересня 1983 р. єп. Адам, был призначений на саноцку катедру, реактывуваной по такой 300. роках, православной перемышльско-новосандецкой єпархіі, а в 1996 році піднесений до ранґы архієпископа.

Православна перемышльско-новосандецка єпархія чыслит днес 3 деканаты, 17 парафій, 25 священників і 1 монастыр. Чысло вірных то ок. 3000. Сут то головні люде і іх потомны, котрым по 1956 році пощестило ся вернути на землю, з котрой были выгнаны злочыном Акциі «Вісла». Хоц то найменьша єпархія ПАПЦ, цілий час ся она розвиват. Доказом того была, і дальше єст, шырока діяльніст владыкы Адама на Лемковині. Його стараньом покликано до жытя новы парафіі і побудувано новы церкви, м.ін. в Ґорлицях, Ряшові, Білянці, Реґєтові, Креници ци перенесено святыню до Розділя. Вартат спомянути, же завдякы владыці Адамови в 1985 році высвячено в Зындрановій перший по ІІ Світовій Войні православний храм на Лемковині. Повело ся тіж одбудувати каплицю в Тыляві, на місци де колиси стояла православна церков, як тіж одбудувано на ново команецку церков, котра згоріла в 2006 році.

Архієпископ Адам покликал тіж Мужскій Православний Монастыр Покровы Пресвятой Богородиці в Высові, Осередок Православной Культуры «Елпіс» в Ґорлицях, ци Православний Осередок Милосердя «Елеос» в Ґладышові. Владыка Адам был ініциятором канонізациі о. Максима Сандовича. Был тіж ініциятором печатной діяльности в реактывуваній єпархіі – в Саноку выдаваний єст Церковний Календар і часопис Антифон.

В 2010 році владыка Адам был нагороджений через Украіньску Православну Церков  Московского Патріархату Ордером св. Петра Могылы, а в 2011 році президент Украіны Віктор Ющенко вручыл Ордер Князя Ярослава Мудрого (V ступеня).

Владыко, приймийте од цілого ансамблю радия лем.фм щыры желаня долгых років жытя в добрым здоровлю та Божой помочы в несіню душпастырской опікы над нашом Лемковином. 

На Многы і Благы Літа!