На Липнику знова розгорить ся ватра

Уж семый раз русиньска молодежна орґанізація молоды.Русины як головный орґанізатор орґанізує фестівал під назвов VII. Русиньска ватра на Малім Липнику. Подія із підназвов „досправды русиньска“ є в рамках русиньскых фестівалів унікатнов у тім, же орґанізаторы на ню все приготовлюють проґрам, котрый є поскладаный чісто із русиньскых інтерпретів.

Русиньска ватра на Малім Липнику є вєдно із подійов Русиньской оброды на Словеньску під назвов Слованости Русинів під градом, котра проходить шторік в сканзені в Старій Любовні, єднов із двох найвекшый і найвызначнішых русиньскых фестівалів в рамках окресу Стара Любовня. Орґанізаторы ватры мають за ціль презентовати Русинів як културно богатый народ. І тогорічный проґрам фестівалу, котрый одбуде ся 16-го юла в селі Малый Липник, є доказом того, же досправды є што з богатой културы вказати навщівникам.

Русиньска ватра на Малім Липнику уж традічно буде творена дакілько тематічныма частями проґраму. На участных чекать блок фолклорных концертів, концерт під назвов Вечур русиньскых голосів, в рамках котрого мож видіти і чути наприклад ай класічну музику, яку одпрезентує слаковый квартет, в котрім так само найдете Русинів, но і не буде браковати ани танечна забава аж до рана. Тоту найвеце люблять молодшы навщівници фестівалу. В рамках проґраму участных будуть забавляти і членове редакції радіа русин фм, котры вже теперь приготовлюють конкурзы, в котрых буде мож здобыти різны нагороды і ціны.

Список выступаючіх є богатый і не будуть браковати ани загранічны гості. Чекають на вас такы інтерпреты і ансамблі як Поляна, Вородай, Вінок, Маріянна Железна, ФК Тарка, НМ Горнад, Лаура Фузеріова, Дівчата із Малого Липника, RuSnacks, Анна Сервіцька, Слаковый квартет, Чехію буде презентовати Тріо Кантар із Прагы, но і з Підкарпатя прийде ґрупа Фатьови.

Подія є реалізована із фінанчнов підпоров Урдяду влады Словацькой републікы – проґрам Култура народностных меншын 2016.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА