На конец марця з Пряшова – «Говорить Пряшів» – середа, 20.00 год.

Кінчыт ся марец, ближыт квітен/апріль, а там, де тото практуют, змінили уж час з зимового на літній. Но і одраз ся жыти якоси барже хоче. Тоты послідні дни марця мают ся вказати теплыма для вшыткых Русинів. Выходит на тото, же нам єдно сонце світит, бо і тым на Карпатскій Руси, ци на чужыні і в дальшых еміґрантскых краінах – тіж тепло.

Тепло робит ся тіж в русиньскым середовиску. Конец марця то добрий час, жебы придбати по низшій ціні вступне на найбільший Русиньскій Фестіваль во Свиднику. Самособом, тепло робит ся тіж в тзв. чырчаньскым середовиску, де уж чути про всякы русиньскы забавы і дискотекы, котры по Великодни будут проходити в поєдных нашых селах. Апелюнок на нашых Лемків в тым місци лем такій: просте Чырч на Лемковину, най і нам шувну дискотеку заграют.

В Пряшові то не тепло, а горячо! В найблизшу пятницю в Театрі Александра Духновича одбуде ся прємера пєсы «Адолф Івановіч Добяньскый». Премєра не без причыны як раз тепер, коли же 2017 рік выголошений роком Адольфа Добряньского. Ідте конче до Пряшова. Аж і председа председ з Польщы заповідал, же приде!

Наконец чужына. Польскій омбудсман ся кликал о стрічу зо Стоваришыньом Лемків. Мают ся бодай на годинку стоваришыти днес.

Днешній «Говорить Пряшів» принесе Вам дашто о університетскы справы. В Нашых целебритах дознаме ся про Яна Бірчака, народженого в Рускій Воли над Попрадом (сусідує лем через воду з нашым Лелюховом, а з другого боку зо славным Чырчом) – фізыка, котрий выкладал тот предмет на Пряшівскым Університеті.

Вшытко тото і іщы більше – днес по 20.00 год. за фльориньскым часом.

За рамівком Русин.фм чытаме: Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.