На кінцю авґуста русиньскый одпуст в Мадярьску

Послідню неділю того місяця, 29-го авґуста 2021-го року, в селі Шайовпалфала одбуде ся традічный русиньскый одпуст при Павловскій чудотворній іконі Пресвятой Богородіці.

Орґанізатором події є містна ґрекокатолицька парохія і Русиньске самосправованя Шайовпалфалы, з підтримков Канцеларії премєра Мадярьска, Вседержавного русиньского самосправованя і далшых містных русиньскых самосправовань і орґанізацій в Мадярьску. Одуст є і націоналным святом Русинів в тій державі.

Торжество зачне в містнім храмі утреньов, по котрій буде одслужена літурґія. Тоту буде служыти преосвященый владыка Атаназ Орос, єпіскоп Мішколцьской ґрекотолицькой єпархії. На події ся участным приговорить і Віра Ґіріц, посланкыня за Русинів у мадярьскім парламенті.

Одпусты в Шайовпалфала

Село Шайовпалфала (мад. Sajópálfala, стара славяньска назва Павлово) находить ся в Боршодьско-абовско-земпліньскій жупі в окресі Мішколц. Ґрекокатолицька парохія, котра находить ся лем 11 км од Мішколца, записала ся до історії тым, же там слызыла ікона Пресвятой Богородіці.

В містнім храмі од праздника Рождества, за старым календарьом, аж до 16-го януара 1717-го року, слызыла ікона, котра была на престолі. Зачало то почас літурґії в першый день праздника Рождества.

Ікону на приказ яґерьского римокатолицького єпіскопа пак однесли до міста Яґер і там єй скрыли. Хоць многы ґрекокатолицькы священици і єпіскопи в історії просили, жебы їм ікона была вернута, 256 років віруючі не знали, што є із Павловсков чудотворнов іконов і як вызерать, бо з ньой не была зроблена ани копія. Аж 25-го октобра 1973-го року была ікона римокатоликами вернута до храму в селі.

Комплетный проґрам русиньского одпусту найдете на плаґаті під статьов.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА