На Кашебах о медиях бездержавных меншын

До кашебского міста на пілночы Польщы зышли ся вчера (13.07.2016) участникы конференциі названой Роля медий як підпора процесів самостановліня европейскых бездержавных наций (The role of media in supporting self-determination for European stateless nations). Тото місто то Вейгерово (кашеб. Wejrowò або Nowé Miasto), в котрым днес о 9.00 год. зачала ся мериторична част стрічы. Єй орґанізаторами сут Стоваришыня Кашебско Єднота і Свобідний Европейскій Союз (European Free Alliance – EFA), котры запросили представників бездержавных меншын, жебы побесідувати о роли меншыновых медий як фактора спераня і розвитку достоменности европейскых бездержавных наций.

По реґістрациі участників, офіцияльне одкрытя конференциі зачало ся выступліньом презеса (кашеб. przédnik) Кашебской Єдноты – Кароля Роде, і директора бюра Свобідного Европейского Союза – Ґінтера Даувена. На конференциі присутны сут м.ін. представникы меншыновых медий: Словенці з італияньского Трієсту, Каталонці, Фризы, Мадяры з Семигороду, Македонці і Туркы з Грециі, Лемкы (Русины), Шлезакы і, очывидно, самы орґанізаторы – Кашебы.

Вчас конференциі будут проведены бесіды, тыкаючы ся медженародовых законів, напр. Рамовой конвенциі о охороні нацийональных меншын і Европейской карты реґіональных або меншыновых языків. Участникы просмотрят тіж пропозицию новой польской уставы о медиях в контексті меншын. Буде і о тым, як меншыны можут мудро і ефективно схоснувати социяльны медиі.

Конференция, котра проходит в Музею Кашебско-Поморского Писменництва і Музыкы в Вейгерові, скінчыт ся заран, т.є 15. липця/юлия 2016 р. До участи в стрічы было прошене лемківскє радийо Лем.фм, котре на конференциі репрезентує його шефредактор, Богдан Ґамбаль.

Полний проґрам конференциі мож найти на сайті орґанізаторів, а сама конференция єст нажыво трансмітувана на фейсбуковым профіли Кашебской Єдноты.