На фестівалі оціненый проґрам о Лемках

В четверь 11. септембра одкрыв ся в Ужгороді XVI. річник міджінародного фестівалу телевізной і радіовой творчости про народностны меншыны під назвов „Мій рідный край“. На тогорічнім фестівалі взяли участь творцьове з Україны, Румунії, Словакії, Мадярьска, Чорной Горы, Сербії, Австрії і Швеції.

На конкурзі было представленых веце як 60 телевізных і 30 радіовых проґрамів. Премію за режію і звук здобыв проґрам Розгласу і телевізії Словеньска – Радіа Патрія – Народностно-етнічного высыланя Словеньского розгласу в Кошыцях „Подобы жывота“. Тот проґрам приготовлює русиньске высыланя Словеньского розгласу і режірує го Яна Трущиньска-Сива. В проґрамі выступають особности русиньского жывота, котры бісідують о собі, о своїй роботі, діяльности, одношіню ку русиньству.

Оцінене было выданя проґраму, в котрім выступав Боґдан Ґамбаль, ведучій Стоваришыня Руска Бурса і редактор lem.fm, якый бісідовав нелем о собі, але і о жывоті Русинів – Лемків.

Сердечно ґратулуєме!