На архієпархіялнім одпусті в Лютині посвятили нову деревяну Церьков Святой родины

Тогорічне архієпархіялне одпустове свято Успіня Пресвятой Богородіці в Лютині в днях 22-го і 23-го авґуста по традічнім посвячіню воды зачало посвячіньом новой деревяной ґрекокатолицькой Церькви Святой родины, кора є збудована подля автентічного храму, котрый стояв в Лютині перед сучаснов Базіліков мінор і згорів у 1908 році. Нова церьков з выглядковов вежов стоїть на скалі в ареалі базілікы і буде тырвалов споминов на Рік родины, котрый ся вже почас другого календарьного рока святкує в Пряшівскій ґрекокатолицькій архієпархії.

З думков збудовати тот храм пришов пряшівскый архієпіскоп і метрополіта Словакії высокопреосвященый владыка Ян (Бабяк, ТІ), котрый церьков і посвятив. На посвячіню быв участный і торонтьскый єпархіялный єпіскоп про Словаків жыючіх у Канаді преосвященый владыка Джон (Пазак, CSsR). Так само была посвячена і нова Крестна дорога і Путь світла, котра веде попід ліс од базілікы на лютиньску гору і творить єй сім двокаплічок.

Проґрам одпусту продовжовав вечерньов архієрейсков святов літурґійов в базіліці Успіня Пресвятой Богородіці, котрой головным служытельом быв братіславскый єпархіялный єпіскоп преосвященый владыка Петер (Руснак) і вєдно з ним служыли і высокопреосвященый владыка Ян і преосвященый владыка Джон. Пряшівскый архієпіскоп і метрополіта в проповіді повів, же в Ґрекокатолицькій церькви на Словакії є Успіню Пресвятой Богородіці присвяченых 54 церьквей, і же доґма о Нанебевзятю Пречістой Дівы была наформулована на основі теолоґічной пропозіції ґрекокатолицького священика проф. Миколая Руснака.

Проґрам далше продовжовав через цілу ніч і в базіліці і на лютиньскій горі. Його частями были головно святы літурґії, побожности, катехезы, проґрам про діти, всеночне бдіня, котре одправляв єпіскоп помічник пряшівской архієпархії преосвященый владыка Мілан (Лах, ТІ) ці промітаня філму. Порґрам мав свою завершальну часть в неділю святочно архієрейсков літурґійов на лютиньскій горі. Головным служытельом быв пряшівскый архієпіскоп і метрополіта Ян і вєдно з ним служыли гайдудорозькый архієпіскоп і метрополіта Мадярьска высокопреосвященый владыка Філіп (Кочіш), торонтьскый єпархіялный єпіскоп преосвященый владыка Джон (Пазак), кошыцькый єпархіялный єпіскоп преосвященый владыка Мілан (Хаутур, CSsR), братіславскый єпархіялный єпіскоп преосвященый владыка Петер (Руснак), єпіскоп помічник преосвященый владыка Мілан (Лах, ТІ) і емерітный єпіскоп помічник празькый преосвященый владыка Йоан Євген (Кочіш). Вєдно з нима і много священиків.

На лютиньскій горі путників несподівало нове перекрытя літурґічного простору, котре іщі не є докінчене, і зреконштруована і розшырена будова за літурґічным простором. Як повів владыка Ян на кінцю святкованя, вшытко, што в Лютиті робить ся, діє ся про благо путників, жебы ся на тім путницькім місці чули добрі і мали вшытко, што путник потребує, жебы ся там все духовно укріпили.

Путници загнали із Лютьны телеґрам папови римскому Францицкови із убеспечіньом о молитвах за нього, і просьбов о благословліня.

Жрідло: grkatpo.sk, оброблене і корочене

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА