МВСіА поділило грошы на діяльніст лемківскых орґанізаций в 2020 році

Міністерство Внутрішніх Справ і Адміністрациі в Польщы на вчерашнім засіданю Спільной Комісиі Уряду та Нацийональных і Етнічных Меншын подало інформацию про поділ дотаций на діяльніст нацийональных і етнічных меншын в будучым році. Част трафит до орґанізаций ци стоваришынь, якы діют в лемківскым або окололемківскым просторі.

Разом міністерияльну підпору в державі отримат більше як 420 проєктів. То в більшости культурны імпрезы, перегляды, стрічы, конференциі, а тіж підпора біжучой діяльности орґанізациі.

На тот момент в 2020 році меншыны достанут близко 2 млн зл фінансовой підпоры менше як того рока. В 2019 році сумарична дотация од МВСіА вынесла близко 15,5 млн зл. Зложыли ся на ню: дотация на біжучу діяльніст орґанізаций, інвестицийна дотация та дотациі на окрислены проєкты (другій набір і признаня додатковых грошы проходило протягом рока). По вчерашній інформациі знатя, што приділено кус більше як 14,6 млн зл на біжучу діяльніст орґанізаций і окрислены проєкты. Брак є інформациі про признаня інвестицийной дотациі.

Кєд іде о орґанізациі, котры як адресатів своіх задач вписуют лемківску меншыну, МВСіА приділило разом 1 318 350 зл дотаций на задачы і діяльніст в 2020 році. То o 90 800 зл менше як дотация на 2019 рік, бо на лемківску меншыну приділено в 2019 р. 1 409 140 зл.

Порівнучы загальну высокіст дотаций на 2020 рік з дотацийом з 2019 рока, то Стоваришыню «Руска Бурса» в Ґорлицях признано аж о 55 500 зл менше, Стоваришыню Лемків – 7 000 зл, Лемківскому Ансамбльови Пісні і Танця «Кычера» – 21 000 зл, Стоваришыню «Лемко Тавер» – 14 800 зл, Обєднаню Лемків – 4 000 зл, Стоваришыню Стара Дорога – 7 000 зл. Лем Товариство для Розвитку Лемківской Культуры в Зындрановій достане в 2020 році більше як в 2019 – о 19 500 зл. Таку саму фінансову підпору отримат Єпархіяльный Осередок Православной Культуры «Елпіс». Новом орґанізацийом діючом для розвитку лемківской культуры, котрій признано дотацию, являт ся Лемківска Едукацийна Загорода. На ведіня варштатів в 2020 році МВСіА приділило ім 7 000 зл.

Фот. Ева Міхна