Музика заклята в дереві і того рока в лемківскых храмах

В выбраных обєктах Пути Деревяной Архітектуры в Малопольщы зас зазвучыт найкрасша музика розмаітых жанрів. Тіж в лемківскых церквах. Фестіваль «Музика заклята в дереві» уж добрі ся розкрутил.

За нами уж першы концерты в рамках вакацийных подій фестівалю «Музика заклята в дереві». Был концерт краківской ґрупы Kroke і ансамблю Armonia Barocca. Перед нами м.ін. піаніста молодого поколіня Оскар Ценкєр (27. липця/юлия), ґрупа Grohman Orchestra (2. серпня/авґуста). То тринадцетособовый ансамбль музиків, котрый наштоден грат музику часів царского Відня і фільмову музику, але найбарже завоювали публику клясиком польской розрывкы. Ганка Вуйцяк, котру знаме м.ін. з выступів з Сусанном Яром, тым разом заспіват вєдно з Павлином Біштыґом. Товаришыл ім буде танец Францішкы Кєрц. Концерт пройде 9. серпня/авґуста.

Церкви в Квятони і Поворознику выполнит джаз, басы і спів

Тыжден пізнійше, 16. серпня/авґуста, пройде першый в тым сезоні концерт в лемківскым храмі. В церкви св. Параскевы в Квятони выступит GGDuo. То дует, якій творит Ґабрєля з мужом Войцєхом. Заложыньом дуету є творіня свойой, неограниченой жанрами і стилями музикы. Она дає вокаль. Він звукы басовой ґітары. Творчіст GGDuo богата є в імпровізацию, чути елементы джазу, соулю, ґоспель, r’n’b ци популярной музикы. Нештодденый ефект звуку дуету операт ся головні на зріжницюваным хоснуваню ріжных басовых ґітар.

Дальшым концертом, якій вызвучыт в церковных стінах, буде выступ дуету: Михал Салямон на клявішах і Мілош Сквірут на контрабасі. Музикы выпрацували свій особливый, околоджазовый стиль і язык. Барз добрі розуміют ся на сцені і поза ньом, што спричынят, же іх выступы полны сут емоций, жару і інтеракций, а поетичны творы з етнічном нутом вандруют од деликатной лірикы по рокову енерґію. Іх выступ пройде уж в першу неділю вересня/септембра в церкви св. Якова в Поворознику.

Вступ для публикы так, але в ограниченым чыслі

Звінчыньом літньой сериі концертів фестівалю «Музика заклята в дереві» буде выступ Йоанны Словіньской з Ансамбльом. Тота харизматична піснярка, знана з репертуару інспіруваного польском і славяньском традицийном музиком, заспіват 20. вересня/септембра в костелі свв. Филипа і Якова в Санковій.

В передпандемічных обставинах публика могла безплатно приходити на вшыткы концерты. Люде громадили ся найчастійше і поза самыма обєктами, наслухуючы выступів з зовнішнього наголосніня – такє было все заінтересуваня концертами, особливі тыма, котры проходили на обшыри Лемковины. Того рока орґанізаторы рішыли, што фестіваль пройде, але в дакус зміненій формі. До обєктів впущане єст ограничене чысло осіб, а аж на пару дни перед концертом орґанізаторы на своім сайті інформуют, ци в загалі будут пущати до даного обєкту публику.

Чысленна публика має можливіст выслухати выступів через сіт інтернету. Вшыткы концерты (реєструваны в неділі о 15.00 год.) трансмітуваны сут о 19.00 год. на каналі Youtube Пути Деревяной Архітектуры в Малопольщы.