Музей в Зындранові дальшый раз завісил свою діяльніст

Музей Лемківской Культуры в Зындрановій од 1. лютого/фебруара завішат свою діяльніст. Причыном є брак одповіднього фінансуваня діяльности Музею зо стороны Міністерства Внутрішніх Справ і Адміністрациі.

То не першый раз, коли зындранівскій Музей примушеный єст ограничыти свою діяльніст. Подібна ситуация была в 2023 р. Товды – так само як тепер – Музей оголосил, же закрыват ся з огляду на брак одповіднього фінансуваня.

Істория ся повтарят

«Музей Лемківской Культуры буде закрытый для одвиджаючых од 1. лютого/фебрура 2025 р. до одкликаня» – то головный переказ комунікату, в котрым Товариство для Розвитку Музею Лемківской Культуры в Зындрановій пояснят причыну ограничыня дільности.

Припомнути же треба, што Музей з причыны низкого фінансуваня дільности Міністерством был уж закрытый в попередніх роках. Послідній раз початком 2023 р. Товды зындранівскій Музей одкрыл ся на літній період, коли зас витал туристів і любителів лемківской культуры.

Теперішня ситуация тіж не є цікава, але подібна до той сперед трьох років. «На жаль, уж дальшый раз дотация на дільніст Музею Лемківской Культуры в Зындрановій была міцно окраяна в однесіню до пропозициі находячой ся в зложеным через нас внеску. З огляду на тото, што за признану Міністром Внутрішніх Справ і Адміністрациі квоту дотациі не в силі сме забезпечыти нормальне фукнцийонуваня і быт Музею, музейный простір в Зындрановій остане закрытый для одвиджаючых в періоді тжякым до передвиджыня» – пише ся в дальшій части комунікату.

Музейникы підкрислили, што зміна центральных власти в Польщы в ниякій спосіб не довела до зміны підходу односно до фінансуваня нацийональных і етнічных меншын. Департамент Реліґійных Вызнань та Нацийональных і Етнічных Меншын МВСіА консеквентно веде в обшыри фінансуваня меншын таку саму політику.

В 2017 р. Музей ограничыл дни одкрытя, бо дотация была о вельо низша як потребы. Поза сезоном музей одкрывали лем в суботы і неділі. О рік зрезиґнувано з орґанізациі музейного свята «Од Русаль до Яна», внескуючы передати грошы на фінансуваня імпрезы на діяльніст музею, жебы могло нормальні фунґувати. А в першых тыжнях 2019 р. музей чысто заперли в звязку отриманьом низшой (33 тис. зл) як внескувана (53 тис. зл) дотациі. Аж черговы неґоцияциі довели до отриманя жаданого фінансуваня.

Не лем Музей Лемківской Культуры

На планный рівен фінансуваня меншыновых діянь Польском Республиком нарікают і другы орґанізациі. О планній ситуациі Лемківского Ансамблю Пісні і Танця «Ластівочка» на посліднім засіданю Головного Заряду Стоваришыня Лемків розповіл Євген Габура, ведучый Кружка в Пшемкові, при котрым наштоден колектив діє.

Габура зазначат, што «Ластівочка» од років отримує дотацию на тым самым рівни. Як примір подає, што 30 тис. зл – дайме на то двадцет років тому – значыло штоси більше, нич тота сама сума грошы в 2025 р. Габура заповіл, што так само задумує ся над будучым дільности колективу, тым більше, што дотеперішні обіцянкы зо стороны Міністерства щезли на ничым.

З єдного боку державны урядникы вымагают од меншын більшой професийональности діянь, жадаючы выполняня окрисленых вымогів, вводячы при тым не все зрозумілы принципы і бюрокрацию, а з другого боку рівен фінансуваня діяльности нацийональных і етнічных меншын од років остає на такым самым рівни, або – як в деякых припадках – не єст фінансуваных, бо причыном был даякій формальный брак (так было в припаді одмовы фінансуваня часопису «Бесіда» початком 2024 р.).

Зо змісту комунікату Музею Лемківской Культуры, як і слів Євгена Габуры, выходит брак довіря до державных інституций і просто брак дальшой надіі і охоты до роботы на благо лемківской культуры.