Музей в Монастырисках отримал колекцию лемківскых кроів

Як інформувал Музей в Монастырисках на Украіні (тернопільска област), його колекция збогатила ся о дальшы елементы традициного лемківского народного крою.

Передал іх Вільям (Василь) Джула, бывшый голивудскій проєктант кроів і колекцийонер давного лемківского облечыня, якій має лемківскє походжыня.

Не был то першый раз, коли передал він до монастыриского музею елементы лемківского облечыня. Передом было то в січни/януарі 2022 р. Товды до Монастыриск трафили не лем ориґінальны річы, часто маючы більше як 100 років, але тіж такы, котры Джула запроєктувал на основі архівальных взорів.

Подібні є і тым разом. Музейна колекция збільшыла ся м.ін. о новы вырыхтуваны кривулькы, але тіж стары елементы, такы як запаскы, кошелі, пацюркы ци жіночы ґорсеты.

Дарунок, якій пришол з Америкы од Вільяма Джулі, был оплаченый при помочы Владка Максимовича, за што директорка Музейного Комплексу «Лемківскє Село» высловила офіцияльну подяку, котру можеме чытати в сіти Facebook.

Монастыриска і околичны місцевости то місце, де доднес прожыват великє чысло потомных переселенців з Лемковины. Як раз ту был основаный Музейный Комплекс «Лемківскє село», што зберат материялы і експонаты, якы были привезены Русинами з Лемковины, кєд в «добровільно-примусовый» спосіб были они переселяны на радяньску Украіну. Під опіком музею сут тіж реконстууваны будівлі, якы мали бы навязувати до лемківскых, што ся находят на поли, де одбыват ся фестіваль «Дзвоны Лемківщыны».

Монастырискій музей находит ся серед тых музеів, в якых мож обзерати народне лемківскє облечыня. В Польщы долгы рокы кроі зберал, забезпечал і выставлювал выдатный діяч і етноґраф Павел Стефановскій. Найбільше чысло ориґінальных кроів днес мож видіти в Музею Лемківской Культуры в Зындрановій. Ориґінальны кроі сут тіж в колекциі ЛАПіТ «Кычера».