Музей Енді Варголя в Пітсбурґу має нового куратора

Музей Варголя в Пітсбурґу вызначыл Аарона Ґарві на нового головного куратора. Свою функцию обойме неодолга – літом 2023 рока.

«Аарон міцно выріжнил ся серед державных кандидатів своім заанґажуваньом в підпераня індивідуальных артистів, особливо кольоровых артистів, а заєдно представлят інновацийный підхід до можливости презентуваня тврочости Варголя публиці» – ствердил Патрік Мур, директор Музею Варголя в Пітсбурґу. «Як наш наступный головный куратор, Аарон має выняткову можніст вызначыти артистичный напрям музею» – дополнил Мур.

Аарон Гарві є жыдівско-американьскым куратором, а його робота зосереджат ся головні на сучасній штуці, будуваню спільноты через творіня публичных проґрамів, орґанізуваню выстав в альтернативных просторах. Тепер є м.ін. директором од кураторскых справ в Jule Collins Smith Museum of Fine Art на Університеті Оберн (в штаті Алябама), є головным куратором в The Hudson Eye/Jonah Bokaer Arts Foundation в Ню Йорку. Скорше занимал м.ін. кєрівниче і бадавче становиско в Art For Thought Foundation в Ню Йорку, SCAD Museum of Art, Savannah College of Art & Design в Саванні в штаті Джорджія та в The Jacobsen Foundation and Collection of American Art в Ню Йорку.

Місце для новых ґенераций

«Єм барз гордый і вдячный за переданя мі той важной ролі в Музею Варголя» – повіл Ґарві. «Нетерпеливі жду можливости заанґажувати наступну ґенерацию ріжнорідных артистичных голосів в передаваня спадковины по Варголи, Музеях Kaрнеґі, міста Пітсбурґ» – подал новый куратор.

В дотеперішній роботі в ріжных інституциях занимал ся м.ін. популяризуваньом і скупуваньом штукы сучасных жыдівскых творців, позыскуваньом робіт жен, артистів з ґруп LGBTQIA+, вводіньом політикы рівности, ріжнорідности, доступу і інтеґрациі при заряджаню колекциями і інсталюваню выстав.

Кураторувал проґрамами выкладів, показів, артистичных резиденций, орґанізувал выставы, артистичны інсталяциі, был продуцентом розмаітых публичных проґрамів і значучых выстав, порадником в будуваню колекций штукы. Є автором чысленных публикаций, в тым каталоґів штукы. Выступує з гостинныма выкладами.

Аарон Ґарві зробил ліценцият з істориі штукы зо специялизацийом сучасна штука на Університеті Пілнічной Фльоридны в Джексонвіль в штаті Фльорида. Маґістерскы студиі на напрямі адміністрация штукы/ музейна адміністрация закінчыл на Університеті Кентукі в Лексінґтон (шт. Кентукі).