Мурянка на XXXIX Святі Ґуральской Поезиі

Уж в найблизшу неділю, 22. жолтня/октобра, Ґмінний Осередок Культуры в Выжній Рабі орґанізує XXXIX Свято Ґуральской Поезиі. Того рока орґанізаторы подіі рішыли запросити специяльного гостя, котрий запрезентує і лемківску поезию. Буде ним наш найвыдатнійший сучасний лемківскій поета – Петро Мурянка.

XXXIX Свято Ґуральской Поезиі зачне ся о год. 12.45 в театральній сали Парохіяльного Дому в Выжній Рабі привитаньом поетів, іх родин і запрошеных гости. Пак передставлений буде артистичний проґрам присвячений творчости Ванды Чубернатовой.

Дальше буде час на лемківску поезию. Петро Мурянка своіма полныма любови та тугы до втраченой отчызны вершами перенесе присутных на свою рідну Лемковину. Запрезентуваны будут тіж вершы поетів з Підгаля, Спиша, Оравы, Пєнін, Сандецкой та Бескідской Земель.

Стрічу збогатит пригрываня ґуральской капелі Звык з Выжньой Рабы.