Мукачівска ґрекокатолицька єпархія має новый собор

В суботу 10-го децембра 2016-го року в Мукачові проходила святочна подія посвячіня нового катедралного собору Мукачівской ґрекокатолицькой єпархії. Собор є присвяченый нашым апостолам свв. Кірілови і Методійови. Церьков ся зачала будовати перед десятьома роками.

Головным служытельом літурґії і посвячіня собору быв высокопреосвященый кардінал Леонардо Сандрі, діпломат Святого престолу, тітуларьный архієпіскоп емоньскый із Ватікану, котрый є префектом Конґреґації про выходны церькви. Вєдно з ним служыли преосвященый владыка Мілан Шашік, єпарха Мукачівской ґрекокатолицькой єпархії, высокопреосвященый архієпіскоп львівскый і метрополіта Ігор Возняк із Україньской ґрекокатолицькой церькви, преосвященый владыка Мілан Хаутур, єпарха Кошыцькой єпархії і далшы єпіскопы за участи многых священиків і народа.

Як на святочній події повів кардінал Сандрі, назва храму має сімболічне значіня, бо святы Кіріл і Методій были творителями єдности міджі церьквами і народами і творителями сполочной духовной дідовизны Европы. До храму были кардіналом Сандрі переданы і мощі святого Кіріла і папы римского Йоана Павла ІІ.

Мукачівска ґрекокатолицька єпархія є найстаршов русиньсков єпархійов, котра выникла по Ужгородьскій унії. Свій центер має в Ужгороді, де по девятьох роках (1780-ый р.) од еріґованя єпархії у 1771-ім році переніс ся єпіскоп Андрій Бачіньскый. Там єпархови служыть як катедралный храм Хрестовоздвиженьскый собор.

Єпархію еріґовав папа римскый Климент ХIV. булов Eximia Regalium. Як раз з ньой пізніше выникали одділіньом ся далшы єпархії і церьковны штруктуры, котры днесь як прямых або непрямых наслідників Мукачівской єпархії можеме найти на Словакії, в Мадярьску, Сербії, в Споєных штатах Америкы, Чеській републіці ці Хорватії.

Жрідло фотоґрафії: Мукачівска ґрекокатолицька єпархія.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА