А може бы так вакациі на Лемковині?

Як доносят нашы тайны аґенты, баламутят Презеса штобы пішол вакациювати на Лемковину. Лем ци досправды приде на нашу землю – тото іщы не знаме. Вшытко буде залежало од того, на якій пут піде. А пропозициі сут бодай три. 

В посліднім одтинку популярного в Польщы сатиричного проґраму «Ухо Презеса» (ч. 23), вірны спілпрацівникы Презеса думают над тым, де бы Презеса післати на вакациі. Єдном з пропозиций є Лемковина – чудова краіна, де мало люди, а і свіжого повітря годен Презес дыхнути. Но, же Лемковина шырока – тото знате. Прото спілпрацівник допрецизувал, што іде му бодай о середню Лемковину. Спомянул на славны Ґорлиці. Та кєд уж приде, при нагоді просиме Презеса до Руской Бурсы. 

І хоц може то чудне, же Вам буде тото пояснене – но, але поясниме. Наша підредакция не любит дезінформациі. Не думайте, же то бесіда про нашого лемківского Презеса. Ніт. Хоц про Презеса (Председу) Пана Андрия К. з Вроцлавя тіж памятаме. Будеме мати на увазі вакациі Презеса Лемків. Дашто в своім часі запропонуєме. Може зас Дева? Або ні. Ліпше Рускій Керестур! 

Здравиме Вас Презесе – підредакция Фафринді 

https://www.youtube.com/watch?v=k0Ont-Y4F0s&t=410s

слухайте од 6:00 мин. 😉 

фот. скрін «Уха Презеса»