Мож онлайн чітати найновіше выданя журнала Отцюзнина. Має уж і властный вебсайт

В літі 2023-го року подарило ся з фінанчнов підпоров америцькых Русинів через професора Павла Роберта Маґочія обновити выдаваня єдиного друкованого русиньского періодіка на Підкарпатю – журнала Отцюзнина.

Выдавателям, котрыма суть Закарпатьске областне научно-културолоґічне общество імени Александра Духновіча і Русиньскый културолоґічный клуб, подарило ся в минувшім році выдати дві чісла журнала.

Уж початком фебруара того року появило ся передплатникам в їх поштовых скринках перше тогорічне выданя Отцюзнины. Но команда здібных людей, котра зышла коло редакції, якой головов є Юрій Шиповіч єдночасно голова Русиньского културолоґічного клуба, все робить на зліпшованю.

Од першого выданя обновленого журнала зліпшовала ся каждым далшым ґрафічна обробка, але і обсяг Отцюзнины. Теперь нашы підкарпатьскы Русины вырішыли дістати журнал до шыршого відома людей і посередництвом властного сайту а соціалных сітей.

Єднов із пожадавок америцькых Русинів, котры підтримали выдаваня Отцюзнины на два рокы, было, жебы журнал быв доступный і в електронічній формі на інтернеті. Тоту пожадавку акцентовав і професор Маґочій на презентації першого обновленого выданя, котра одбыла ся на кінцю місяця юл 2023-го року.

Дочасным притулком став про Отцюзнину і наш сайт, кедьже наша медіална ґрупа підпорує Русинів на Підкарпатю, котры не мають жадной підпоры од свойой державы, а невеце є сітуація на Україні іщі складніша вдяка войні. Зато сьме все по даякім часі од выданя публіковали на сайті електронічну верзію журнала.

Теперь Отцюзнина зробила першы властны крокы у світі інтернету. У фебруару быв створеный новый вебсайт журнала, де мож найти выбраны статі із друкованой верзії, а недавно прибыла там і повна електроніча верзія найновішого выданя, котру мож чітати.

Отцюзнина появила ся і на соціалных сітях. Покля хочете знати вшыткы новоты односно журнала, мож собі Отцюзнину найти і в рамках сітей Facebook а Instagram.