молоды.Русины мали сейм. Выбрали нового председу

В неділю 6-го децембра 2015 р. проходив сейм молодежной орґанізації молоды.Русины. Із функції председы одышов Петро Штефаняк, котрого вычеряв Петро Ярінчік. Делеґаты сейму стрітили ся на сеймі в селі Малый Липник, старолюбовняньского окресу.

На сеймі в неділю, орґанізація має сейм шторік, із функції одышов Петро Штефаняк, котрому была передана „Почестна нагорода за довгодобый вклад у розвитку молодежі русиньского народа“. На функцію председы быв выбратый Петро Ярінчік, котрый походить зо Шамброна і в професійнім жывоті робить проґраматора. Сейм выбрав і нову Дозорну раду і Выконный выбор. Майже ціле веджіня орґанізації было вычеряне новыма людми. Штефаняк не кандідовав на жадну функцію і зістав рядным членом орґанізації.

Орґанізація молоды.Русины офіціално выникла у 2008 році в Братіславі. Свої містны орґанізації окрім Братіславы має і в Нітрі, Кошыцях і Старій Любовні. Головным основательом, котрый од 2008 року стояв на челі орґанізації, быв Петро Штефаняк. Мено Штефаняка і орґанізації молоды.Русины є таксамо повязане із заснованьом Фолклорного ансамблю Рутенія, ці заснованьом радіа русин фм, но і далшых проєктів, котры молоды.Русины роблять про розвиток русиньской културы на Словакії і здобытя молодых людей, котры мають русиньске коріня. Молодежна орґанізація є таксамо членом і основательом Світового форума русиньской молодежі, на челі котрого довгы рока стояв як раз представитель орґанізації молоды.Русины – Мартін Караш. В Братіславі орґанізація вытоврила Центер молодых Русинів, котрый служыть як центер културного жывота Русинів, котры жыють або штудують в головнім місті Словакії.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА