Молода авторка вертать ку своїм коріням і ожывлює русиньску дідовизну в знимках

Марія Ґалишінова має русиньске походжіня. Ку своїм коріням вырішыла навернути ся через тото, чім найвеце любить занимати ся – фотоґрафію. І так выникла серія знимок, котру теперь мож видіти в рамках выставкы під назвов Ожывліня дідовизны русиньской културы.

Молоды з русиньскых сел одходять, і старшы зіставають одрізаны од решты світа, многораз в самоті, но в оточіню непоскверненой природы і духа културной і історічной дідовизны предків того краю, пише ся в анотації выставкы молодый авторкы.

Якраз тот богатый одказ хоче Марія Ґалишінова припомянути, і єдночасно верать ся тым ку своїм коріням.

„Кедьже мій отець і ціла його родина суть Русины, тота тематіка є барз мому сердцю близка. Ціле своє дітинство єм ходила на вакації ку старым родічам до села Гостовиці, котре дотеперь з надхненьом навщівлюю. Вдяка родині, приємній носталґії, природі, приятелям, співанкам, памяткам, традіціям, автентіціті і погостинности жытелів,“ говорить молода фотоґрафка і авторка споминаного проєкту.

За помочі умелецькой фотоґрафії Ґалишінова має намір ожывити красы русиньской културы і приближыти їх шыршому кругу людей. Выставку мож од 19-го апріля 2021-го року видіти аж до їй закінчіня в селі Гостовиці, Сниньского окресу, перед сельскым урядом. Пак буде єденадцять умелецькых фотоґрафій, котры суть выставлены, подарованых старостови села, і знимкы будуть далше окрашати інтерьєр містного културного дому.

Покля вам до Гостовиць іти далеко, Марія Ґалишінова думала і на вас. Експозіція проходить і в онлайн просторі , жебы ся ку знимкам міг дістати каждый. Так само ся там дасть посмотрити і на то, як выникав проєкт вдяка супроводным фотоґрафіям. Онлайн выставку найдете за тым мотузком.

Марія Ґалишінова закінчіла маркетінґову комунікацію на Універзіті Коменьского в Братіславі. На высокій школі під веджіньом фотоґрафа Матуша Заяця розвивала і свої ґрафічны а фотоґрафічны здібности. Моментално жывить ся як фотоґрафка. Проєкт Ожывліня дідовизны русиньской културы зреалізовала з фінанчнов дотаційов з Фонду на підпору културы народностных меншын.

Фотоґрафія: Марія Ґалишінова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА