Мій язык. Моя культура

Меншыновы языкы, нестандартны одміны языка та звязаны з нима культуры то тема конкурсу «Мій язык. Моя культура», якій был оголошений Выділом «Artes Liberales» Варшавского Університету.

В конкурсі взяти участ може каждий, без віковых ограничынь, аж і діти. Охочы мусят представити в формі знимкы або фільму конкурсову тему. Фотоґрафію треба допасувати до єдной з трьох катеґорий:
· Язык і культура довкола мене – образы презентуючы присутніст языка і культуры в выбраных просторах, краєвиді, предметах ітп.;
· Языкы і іх хоснувателі – знимкы представляючы люди і культуру в навязаню до меншынового языка;
· Ту і тепер – фотоґрафіі документуючы теперішні або минулы ситуациі або подіі, вказуючы языково-культурову ріжнорідніст.

Як іде о відеозапис, то не може він тырвати веце як 60 секунд. Авторы прац можут хоснувати якє-небуд нагрываюче нарядя, м.ін. мобільку, таблет, камеру ітп.

Каждий з беручых участ в конкурі може зголосити максимально 3 знимкы та єден фільм. Конкурсовы роботы треба слати на майльовий адрес: olga.chromik@al.uw.edu.pl до 1. жолтня/октобра 2018 р.

Реґулямін конкурсу і більше о ним інформаций найдете за тым мотузком.

Орґанізация конкурсу «Мій язык. Моя культура» єст елементом проєкту «Engaged Humanities» реалізуваного в рамках ґранту Horyzont 2020.