Віцеміністер Томаш Шыманьскій і Нижньошлезскій Воєвода Мацєй Авіжень стрітили ся з представниками меншын

В четвер 23. мая 2024 р. секретар стану в Міністерстві Внутрішніх Справ і Адміністрациі Томаш Шыманьскій і Нижньошлезскій Воєвода Мацєй Авіжень стрітили ся в Нижньошлезскым Воєвідскым Уряді з представниками стоваришынь і звязків репрезентуючых нацийональны і етнічны меншыны.

Вчас бесід міністер Томаш Шыманьскій поінформувал, же єст то перша робоча стріча, але заґарантувал, што будут ся они одбывати реґулярно, при участи іщы векшого чысла орґанізаций.

«Міністерству залежыт, жебы активізувати люди, што належат до меншын» – повіл міністер. «Можете рахувати на нашу одкрытіст і заанґажуваня» – звернул ся до представників меншын.

Стріча з Нижньошлезскым Воєводом

Участны представили діяльніст своіх орґанізаций і проблемы, з котрыма мусят ся міряти. Бесідували о вчыню языків, шыріню культуры, представляню своіх традиций і звыків.

В стрічы вляли участ зо страны лемківской: Євген Габура – заступця предсідателя Головного Заряду Стоваришыня Лемків, і Богдан Копча – член заряду СЛ. Інчы меншыны репрезентували м.ін. украіньску: Ігор Салямон – ведучый вроцлавского кружка Союзу Украінців в Польщы, та Адам Вєвюрка з Обєднаня Лемків, Марийоля Абкович – ведуча Союзу Польскых Караімів, представничка караімской меншыны в Спільній Комісиі Уряду та Нацийональных і Етнічных Меншын, ци Ізабеля Шпаценко з Соспільно-Культурного Товариства Жыдів в Польщы.

З урядовой страны на стрічы присутна была Ксеня Альгаунґ, заступчыня директора Департаменту Реліґійных Віроісповідань та Нацийональных і Етнічных Меншын в МВСіА і Войцєх Скшыпчык, директор Бюра Воєводы та Полномічный Нижньошлезского Воєводы до Справ Нацийональных і Етнічных Меншын.

Стріча зо вшыткыма воєводами

В пятницю 24. мая 2024 р. Міністер Внутрішніх Справ і Адміністрациі Томаш Сємоняк брал участ в нараді зо вшыткыма воєводами.

«Робота воєводы єст барз выамгаюча і інтенсивна. Реаґуєте на барз тяжкы, екстремальны ситуациі. Будте видимы в терені, вказуйте своі діяня» – повіл міністер Томаш Сємоняк вчас нарады.

В стрічы участны были тіж секретар стану в Міністерстві Внутрішніх Справ і Адміністрациі Томаш Шыманьскій, підсекретар стану в Міністерстві Фінансів Ганна Майщык та підсекретар стану в Міністерстві Климату і Середовиска Аніта Совіньска.

Головном цілю было омовити найважнійшы квестиі поміщены в рыхтуваных воєводами рапортах одкрытя з фунґуваня воєвідскых урядів. Серед порушаных тем были справы звязаны з реализацийом буджетів ци охороном середовиска і нелеґальныма складовисками смітя.

Віцеміністер Шыманьскій дальше хоче познавати меншыны

Віцеміністер Томаш Шыманьскій вчас одправы припомнул, што МВСіА єст в постійным контакті з воєводами. Заповіл тіж свою візиту в черговых воєвідствах по тым, як был з візитом в нижньошлезскым і шлезскым.

«Підтримую тото зобовязаня, жебы познати специфіку фунґуваня там, на місци. Іде не лем о діяня зінтеґруваной адміністрациі, але тіж о обшыр нацийональных і етнічных меншын і конфесийных звязків» – повіл.

Секретар стану в МВСіА однюс ся тіж до рапортів одкрытя представленых воєводами. «Маючы на увазі квестиі проблемів і вызвань, загорозы, з котрыма пришло ся Вам міряти, вчас послідньой стрічы попросил єм о зрыхтуваня рапортів одкрытя. Уж мате тото знаня – рапорты уж сут зрыхтуваны» – передал.