Міністер культуры: штука Юрия Новосільского богата єст в таємниці

То знаменита штука, богата в таємниці – повіл 25. мая тр. міністер культуры Пьотр Ґліньскій вчас вернісажу выставы «Юрий Новосільскій. Протипрагніня» в варшавскій Кордеґарді, ґалериі Нацийонального Центра Культуры. «То выстава посвячена великому артисті» – додал.

«Для ня Новосільскій є головні кольористом, але в його творчости є барз вельо змісту, медже інчыма глубока філософія, теолоґія. То знаменита штука, богата в таємниці» – підкрислил шеф ресорту культуры. Припомнул, што того рока празднує ся в Польщы Рік Юрия Новосільского, і є то нагода, жебы презентувати його творчіст. «Завдякы спілпрацы з вельома інституциями та приватныма колекцийонерами повело ся зобрати так вынятковы роботы. То выства посвячена великому артисті, великому малярьови. Мам надію, же до Кордеґарду будут приходити толпы люди, а Юрий Новосільскій буде притігал нову публику» – повіл.

Iконове i іконічне малярство

На выставі зорґанізуваній Нацийональным Центром Культуры в звязку з празднуваньом сотной річниці народин артисты презентуваных є вісемнадцет робіт, в тым вельо праві незнаных шырокій публиці. Експозиция обнимат акты, мертву натуру, краєвиды і портреты. Як достерюг шеф Нацийонального Центра Кукьтуры Рафал Віснєвскій, презентуваны роботы вказуют Юрия Новосільского як твроцю, котрый в «сучасный спосіб бесідує о традициі».

Вчас вернісажу о творчости Новосільского оповідал тіж знавця його творчости історик штукы єпископ Михал Яноха. «Новосільскій оповідал о Богу, вірі, світі. В рамках єдного языка так лучыл тото, што належыт до сфреы сакрум і профанум. Не знам найти артисты, котрый бы так ретельно тото синтетизувал» – ствердил єпископ Яноха. Додал, што автор образів презнетуваных в Кордеґарді через быстру обсервацию «синтетизувал тіж жытя і штуку». Підкрислил, же хоц сохнувал аванґардовы технікы, то єднак все «оставал в сфері традициі ікон, котра корінями сігат Византиі».

Односячы ся до слів єпископа Янохы, кураторка выставы Катажына Габер повіла, што Новосільскій был артистом «завішеным медже Парижом а Візантийом. Незалежні од темы образів все было в них іконове малярство. Є в них іконовый порядок, щыріст форм і простота». Додала, же малярство Новосільского є тіж потверджыньом його слів, же «малярство зачынат ся там, де ся кінчат інчы формы выражыня».

Выстав в Кордеґарді є доступна до 25. червця/юнія.

«Новосільскій то маляр сну, візиі, святой шаленоты. О своій штуці бесідує, же є оддзеркаліньом борбы ангела з дяблом в чловеку. Творит світ, котрый для вельох єст обшырю спокою, полегшыня, щестя, але спілістнує і з похмарныма візиями галюцинаций, ґу котрым веде натхнена шаленота артисты» – чытаме о артисті в запрошыню до выставы.