«Миколаі» заграют в Варшаві на “руского” Миколая

В суботу, 19. грдуня/децембра т.р., на самого руского Миколая, ансамбль «Оркєстра св. Миколая» приде до Варшавы. Ґрупа найперше буде вела варштаты співу та гры на пастырскых інструментах (12.00-14.00 год.), а вечером заграт концерт (19.00 год.). Подіі одбудут ся в західній части Варшавы – Бемово, в Бемівскым Центрі Культуры «АртБем».

Вчас варштатів артисты з «Миколаів» будут презентуваты і вчыти гры на мало знаных інструментах, напр. чуринґа, ци нютня. Участникы варштатів зрыхтуют з артистами спільну співанку, котру потім запрезентуют на вечернім концерті.

Більше інформаций м.ін. про білеты – за тым мотузком.

Посліднім часом Оркєстра заграла на Музычній Сцені Традициі. Іх выступ припомнул о надходячій новій платни ансамблю пн. Моды і коды, котра уж неодолга буде доступна для вірных фанів ансамблю.

Музычна Сцена Традициі то проґрам нажыво – концерт з участю публикы, емітуваний в Проґрамі 2. Польского Радия. Концерты сут орґанізуваны в студию ПР ім. Владислава Шпільмана. Головна ціль радийовых концертів – прилближыти слухачам найцікавшых фольковых і народных артистів, так з Польщы, як і з заграниці. За приведеным горі мотузком, можете обізрити награня з выступу ансамблю в студию Польского Радия.

«Оркєстра св. Миколая» є добрі знана в лемківскым середовику. Ґрупа выконує пісні з обшыри цілой Лемковины, а в іх дискоґрафіі все находили ся даякы лемківскы/русиньскы елементы. Окрем того, ансамбль в 2007 році печатал вынятковий кружок, посвячений лем творам співаным в русиньскым языку. Lem-agination то цікава пропозиция вірного одтворіня народной музыкы з Лемковины. Ґрупа заграла творы на інструментах, котры дашнійше были хоснуваны через лемківскых/русиньскых гудаків, a стиль співаня тіж в деякій мірі навязує до тамтого часу. Ансамбль од 1991 рока орґанізує Медженародовий Фестіваль Народной Музыкы, шырше знаний як Фольковы Миколайкы. «Миколаі» концертували на вельох русиньскых подіях, м.ін. на Лемківскій Ватрі на Чужыні в Михалові.

Долов, лемківска співанка Дружба я си дружба.