Міджілабірці в проєкті з Ґмінов Заґуж. Буде ся і войовати

Як інформує офіціалный сайт міста Міджілабірці, самосправа підписала змлуву на фінанчну дотацію про реалізацію сполочного мікропроєкту „Польско-словацьке подорожіня в часі“ вєдно із Ґмінов Заґуж в Польщі.

Актівностями проєкту суть на польскім боці выроба історічного філму о Карпатах і конференція, в рамках котрой ся філм одпремєрує. Із словацького боку мають Міджілабірці задачу зорґанізовати реконштрукцію боїв з Першой світовой войны із нагоды 100-ой річніці їй закінчіня, котру припомянеме собі в місяці апріль 2018-го року.

Реконштрукція боїв буде доповнена супроводныма подіями як презентації добовой воєньской музикы, добовой народной музикы з тематіков тематіков реґрутьскых, воєньскых співанок, приготовити ся має і театрална пєса присвячена войновым діям, презентовати ся має добова мода і жывот людей в тім часі, вкаже ся із чім ся втогды войовало, но браковати не будуть ани історічный влак і летадло, выставкы, лекції історіків, фестівал воєньской кухні, пєтны акты ці події про дітей. На цілім проґрамі бы мало брати участь коло 400 выступаючіх. Будуть то участници із Словакії, Польщі, Чеськой републікы, Мадярьска, Австрії, Україны, Росії, Італії, Словенії і Румунії. В рамках проєкту бы мала быти написана і выдана публікація о общій історії міста Міджілабірці.

Цілковый розрахунок проєкту є веце як 43 тісяч евр, Міджілабірці платять до розрахунку пять процент із цілковой сумы. Мікропроєкт є співфінанцованый Евроспков унійов із средств Евроспкого фонду реґіоналного розвитку і державным розрахунком Словакії в рамках проґраму Interreg V-A Польща – Словакія 2014 – 2020.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА