Метрополіта Йоан Бабяк одслужыв панахіду за жертвы комуністічного режіму

У віторок 19-го новембра 2019-го року пєтным актом кладжіня вінців при памятній таблі жертв комуністічного терору і насилства на Главній уліці в Пряшові собі представителі Пряшівского самосправного краю вєдно із Конфедераційов політічных вязнів Словакії і представителями Ґрекокатолцькой церькви на Словакії припомянули тых, котры бойовал за свободу, но самы за то заплатили жывотом.

На пєтній події брав участь председа Пряшівского самосправного краю Мілан Маєрьскый і Высокопреосвященый Йоан Бабяк, архієпіскоп пряшівскый і метрополіта Словакії. Архієпіскоп за жертвы режіму одслужыв панахіду. Конфедерація прияла за почестных членів єпіскопів Ґойдіча і Гопка.

Затля сьме комунізм не одсудили

За словами архієпіскопа сьме жертвам довжны розобрати ся з комуністічнов ідеолоґійов. „Затля сьме єй не одсудили як злочінецьку сістему і не діштанцовали сьме ся од ньой цалком і навсе. Дотеперь нам не старчіло 30 років свободы, жебы сьме одсудили комуністічну сістему і то о нас говорить, же іщі не сьме цалком свободныма,“ цітовав денник Korzár Бабяка.

Конфедерація політічных вязнів Словакії прияла меджі себе за своїх почестных членів in memoriam блаженых єпіскопів Павла Петра Ґойдіча і Василя Гопка. Обидвоми были суджены по такзванім Пряшівскім соборі з 1950-го року, коли не хотіли перейти на православя, у выконштруованых політічных процесах. Ґойдіч в арешті вмер. Декреты за них перевязв метрополіта.

Свободу треба хоронити

На події брав участь і державный секретарь резорту школства, русиньскый політік Петро Крайняк, котрый є так само членом конфедерації. „Потребуєме в школах о тім омного голосніше бісідовати. Не забывайме на тоты людьскы долі, не забывайме на на нашу минулость,“ конштатовав Кайняк.

Пряшівскый жупан Мілан Маєрьскый апеловав, жебы сьме дяковали Богу за дар свободы і дяковали вшыткым тым, котрых туга по свободі была векша як страх з терору і насилства. „Хороньме собі свободу, котру маєме, і не дайме собі єй вкрасти никым і ничім,“ повів на події Маєрьскый.

Жрідло фотоґрафії: Prešovský samosprávny kraj.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА