Метрикы войводиньскых Русинів будут діґітализуваны

Як заявлят пресова аґентура Рутенпрес, Завод за культуру войводиньскых Руснів внет зачне діґітализуваня метрикальных книг грекокатолицкых парохій в Себріі. Проєкт обыйме тоты парохіі, якы сут русиньскыма. Діґітализуваны будут книгы, што рахуют більше як сто років.

Буде то першый проєкт, на якій Завод в тым році отримал фінансы. Задача єст підпорена в квоті 600 тис. динарів через сербскє Міністерство Культуры і Інофмуваня.

Істория русиньскых родів

В рамках веденых прац здіґітализуваны будут метрикы з такых грекокатолицкых парохій як в Коцурі, Старым Вербасі, Новым Саді і Дюрдьові. Серед метрик находят ся метрикы крещыня, вінчаня і помершых, значыт вшыткы тоты метрикы, якы через рокы были списуваны парохами. Так само сут списы податків – вплачаных вірныма.

Фінально метрикы мают быти доступны онляйн на сайті орґанізациі. Цілю діґітализацийного проєкту єст не лем сохранити богатство записів метрик, але так само заінтересувати будучы ґенерациі минулым войводиньскых Русинів.

Завод за культуру войводиньскых Русинів додає, што реченый проєкт є лем частю більшых плянів, якы орґанізация має розложены на найблизшы рокы. Отже, діґітализация церковных метрик і податків в будучности має быти частю більшого проєкту, якого результатом буде популяризация родовой істориі войводиньскых Русинів.

Поєдны метрикы приносят цінны інформациі. Дознати ся з них мож не лем про історию і родостром свойой родины, але так само познати причыну смерти даной особы ци професию і занятя вірных. Окрем того, даны з метрик служыти можут до социйолоґічных досліджынь структур жытелів і анализі демоґрафічных статистик.

Хосен про вшыткых

Діґітальны метрикы мают быти доцільово доступны про вшыткых, розуміє ся не лем про Русинів в Сербіі. База фунґувати має безплатно.

Найстаршы метрикы і списы походят з років 1778 і 1779 з коцурской і керестурской парохій. Дальшы з інчых парохій сут дакус молодшы. Окрем факту, што церковны метрикы і податковы книгы можут быти цінны для дослідників і науковців, інтерес о них можут мати потомны русиньскых родин, якы одышли в ХVIIІ ст. до Войводины. Ґенеалоґічны інформациі зато можут чырпати самособом Русины з Карпат, одкале перед роками одышли на обшыр днешньой Сербіі іхні предкы.