Меншыновый фонд буде господарити з 8,8 міліонами евр. Парламент схвалив новелізацію закона

Меншыновый фонд буде мати по новому алокованых 8,8 міліона евр на рік. Выходить то із новелізації Закона о Фонді на підпору културы народностны меншын, котру у віторок 17-го септембра 2024-го року схвалили депутаты Народной рады Словацькой републікы.

Фонд так буде мати о пів міліона евр веце, што є повязане з тым, же у 2023-ім році Словакія признала далшу, вже 14-ту народностну меншыну – Вєтнамців. Підпору так по новому буде діставати і тота меншына. Дотеперь фон господарив з розрахунком на уровни 8,3 міліона евр.

Веце і на ход фонду

Новелізація закона приносить і зміну чісла членів Справной рады Фонду на підпору културы народностных меншын. Дотеперь їх было 15, в новелізації пише ся о 17-ох членах.

„Кедьже за коордіначну раду або фахову раду вєтнамской народностной меншыны прибуде в справній раді фонду єден член, справна рада бы мала парове чісло членів. З той причіны пропонує ся, жебы міністерка културы Словацькой републікы меновала і одкликовала двох членів справной рады. Справна рада так буде мати 17 членів,“ пояснили передкладателі новелізації, котрыма были депутаты коаліції.

По новому ся так само підвышыть проценто із встановленый грошей фонду, котры може фонд схосновати на властный ход, конкретно із шість на сім процент. Тото было подля передкладателів потрібне з причіны того, же были підняты здравотны одводы од початку рока, а так само суть векшы кельчікы фонду на енерґії.

Міністерка новелізацію вітать

Міністерка културы Мартіна Шімковічова схваліня новелізації закона о фонді парламентом привітала.

„Зміны у фонді вітам, бо то посилнить поставліня далшой з меншын жыючой на Словакії. Надію ся, же і вдяка посліднім змінам, котры з новелізації выходять, фонд іщі ліпше буде годен повнити собі свою верейноправну функцію, што в конечнім дослідку буде на благо вшыткых народностных меншын,“ повіла міністерка.

Припомінкы робочой ґрупы не запрацовали

По новелізації закона о фонді кликали народностны меншны вже давно. Акутна потреба новелізовати го пришла по тім, што урядницька влада Людовіта Одора в минувшім році признала вєтнамску народностну меншыну за 14-ту офіціалну меншыну на Словакії.

Выбор про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность, занимав ся темов новелізації закона на своїм засіданю в септембрі 2023-го року. Выбор втогды прияв узнесіня, котрым дав задачу втогдышньому уповномоченому про народностны меншыны Ласлови Буковскому, же скликав робочу ґрупу, в котрій бы были і представителі меншын, і котра бы приготовила новелізацію закона.

Причін, чом меншыны хотіли брати участь на приготовліню новелізації было веце. По перше, по ріках фунґованя фонду меншыны виділи, што не фунґує, што бы могло зліпшыти ся, і тоты зміны треба запрацовати до закона. Меншыны просто хотіли векшу новелізацію, не лем векшу алокацію фінанцій і прикапчаня Вєтнамців на грошы з меншынового фонду.

По друге, меншынам была на данім засіданя вказана таблічка, котру приготовило Міністерство културы Словацькой републікы, подля котрой бы Вєтнамці мали дістати 1,2 процента з розрахунку фонду, а взяти бы ся по десятинках процент мало найвекшым меншынам – мадярьскій, ромскій і русиньскій.

В конечнім дослідку бы нихто по новому не мав менше грошей в абсолутных чіслах, бо раховало ся із 8,8 міліонами, з котрыма фонд буде ґаздовати, но три найвекшы меншыны бы мали менше проценто. Проти того озвала ся і русиньска меншына, бо і кедь фінанчно на тім не буде гірше по новому, але Русины радікално наросли в посліднім списованю, а новелізація закона то нияк не рефлектовала.

Робоча ґрупа выникла, но мала лем єдно засіданя, і то в октобрі минувшоог року. Далше засіданя мало быти в марці того року, но было одкликане. Наконець жадны пропозіції робочой ґрупы не были запрацованы до новелізації, і зробила ся лем зміна, котру резорт културы одпрезентовав на засіданю выбору в септембрі минувшого року.

В припаді Русинів платить, же по новелізації не будуть мати менше грошей, но будуть мати менше проценто з розрахунку фонду, хоць подля даных із списовань їх чісло од 2011-го до 2021.го року наросло із 33 482 на 63 556 особ.