Меншыны, міґрациі, вельокультуровіст – майова конференция в Познані

Выділ Політичных Наук та Журналистикы Університету Адама Міцкєвича в Познані кличе на дальшу наукову конференцию, яка присвячена буде темам повязаным з функцийонуваньом нацийональных і етнічных меншын. Конференция пройде в днях 10.-11. мая 2018 р. Охочы брати в ній участ можут ся іщы зголошати лем до 27. марця.

Плянувана подія то продолжыня зачатого в 2015 р. циклю конференций присвяченых фунґуваню закону про нацийональны і етнічны меншыны та про реґіональний язык. Тота загальнопольска серия конференций зве ся Меншыны-Міґрациі-Вельокультуровіст. Каждого рока сут інчы темы. Орґанізаторы так іх доберают, штобы были они в духу загальной ситуациі і подій в медженародній політиці тыкаючій шыроко понятой меншыновой справы.

На тогорічній познаньскій конференциі буде мож стрітити ся з такыма темами як: дефініюваня детермінантів польской етнічной (нацийональной) політикы, односины польского соспільства до меншын, бракы в польскій етнічній політиці, вельокультуровы соспільности ци політичны консеквенциі функцийонуваня вельокультуровых соспільности. В дводньовым панели найдут ся тіж темы присвячены дилемам повязаным з фунґуваньом нацийональных і етнічных меншын в Европейскій Уніі, в тым чыслі і в Польщы. Того рока головном темом буде госло «Новий вымір вельокультуровости. Меншыны і міґранты з перспективы ХХІ столітя».

Основом того рода конференций орґанізуваных на Університеті ім. Міцкєвича в Познані сут дебаты, участниками якых сут політикы, урядникы, передставникы орґанізаций третього сектора, дослідникы ци члены соймовой Комісиі Нацийональных і Етнічных Меншын та Спільной Комісиі Уряду і Нацийональных та Етнічных Меншын. До конференциі прошены сут заєдно установы занимаючы ся протидіяньом дискримінациі на етнічным фоні, т.є. Омбудсман ци Полномічний Уряду до справ Рівного Трактуваня. Запрошыня до участи  в конференциі є направлене головно на дослідників социйолоґіі, права, політолоґіі, культурознавства і дальшых професий повязаных з функцийонуваньом меншын в Европі.

Цілю орґанізаторів акциі є покликати ансамбль, якій занял бы ся досліджаньом соспільных, економічных, культуровых і політичных обшыри повязаных з вельокультуровістю.

Всякы деталі найдете за мотузком.