Меланія і Павел Стеранкы з Новой Веси – в проґрамі 70% – субота 20.00 год.

В Новій Веси вродил ся 30. марця 1873 рока кыр Василь Масцюх. 11. грудня 1934 рока папа Пій XI призначыл го Апостольськым Адміністратором Лемковины. Кыр Василь Масцюх вмер 12. марця 1936 рока, похований єст на цмонтери в Новій Веси. На тым же цмонтери похований дідо нашого респондента, о. Василь Смолиньскій, котрий долгы рокы был парохом Новой Веси. «Тамтышня церков уж не істнує. Она была спалена вночы по візитациі польського примаса в 1975 році. Стару церков хоснували римо-католикы, як і хоснуют новий костел, поставлений на місци спаленой церквы» – мож чути в днешнім проґрамі.

Днешні нашы гості, Павел і Меланія Стеранкы, Апостольского Адміністратора Лемковины не годны памятати, бо были цілком маленькы, але його памятник на цмонтери і фото отця Масцюха на ним памятают доднес. Тот скромний днес монумент, товды – на фоні простых деревяных крестів – выглядал барз шумні. Хоц, як знаме, священник не встиг быти хіротонізуваний на єпископа, жытелі Новівси з пошаны чествували отця Василя Масцюха лемківскым владыком.

А отця Смолиньского они памятают добрі. І можут о ним вам щыро оповісти. А тіж о школі, учытелях, о реляциях в Новівси медже Лемками а Поляками, Жыдами, Циґанами… Дознате ся тіж, як колиси ішло ся до сповіди, якы методы вчыня практикували в школі, кого найскорше брали з Новівси до Червеной Арміі і што то єст шарварок.