Меджі Старинов і бывшым селом Руське є 14 км обновленых біціґльовых стежок

Старину і бывше село Руське, в Сниньскім окресі, капчать 14,3 км зреконштруованых біціґльовых стежок. Роботы тырвали веце як рік а выжадали собі цілкову інвестіцію 7,4 міліона евр. Інформовала о тім Даша Єленьова з Одділіня комунікації Пряшівского самосправного краю (ПСК).

„Днесь є то о понад 14 кілометрів довгій готовій трасі із Старины по Руське, котра має капчаня на ціклотрасу выбудовану штатныма лісами, яка іде аж на польскый бік на Руське сідло, што нам уможнює досправды красну біціґльову приємность,“ повів у віторок 28-го мая 2024-го року почас переданя зреконштруованых стежок до хоснованя председа ПСК Мілан Маєрьскый.

Притягне турістів, створить робочі можливости

„Но то не вшытко, уж в близкім часі то буде о новых выбудованых ці добудованых ціклотрасах і в напрямі на Стащін, а меджі Влычом і Кривым. Цілково в рамках ціклоокругу Poloniny trail бісідуєме о 26 кілометрах, што є приблизно третина нашого проєкту, і то вже справды фантастічне чісло,“ додав пряшівскый жупан.

За словами Маєрьского біціґлісты поступно приходять обдивляти пекрасны Полонины і тутешню сценерію природы на двох колесах.

„Кедь скапчаме народный парк з окресным містом Снина, буде то єдно прекрасне біціґльове діло, котре до того куточка нашого краю бізовно притягне іщі векше множество і загранічных турістів. Поможе то турістічному руху і людям, котры ту жыють, бо їм то принесе новы робочі можливости што до уквартельованя і стравованя,“ думать председа ПСК. Як далше повів, Полонины бере як цілок, де край хоче створити комплекс служеб.

Перед докінчіньом далшы части

Перед докінчіньом суть і далшы части Poloniny trail. Край в напрямі на Стащін будує вісем кілометрів новых ціклотрас, біціґльову лавочку, підход і далшы елементы в рамках інфраштруктуры про біціґлістів.

Меджі Влычом і Кривым реалізують ся роботы на добудованю біціґльовой стежкы в довжці 3,5 км, а так само там прибудуть і далшы елементы інфраштруктуры, наприклад алтанок.

В плані є і обнова полонинськых частей біціґльовых стежок в довжці майже 38 км. Дотулять ся то части напрямом на Снину, части Влыч – Березовець – Кална Розтока, части стежкы на Кривый, але так само части Рунина – Руськый Потік – Кривый – Кална Розтока – Стащіньска Розтока – Стащін.