Медженародний Фестіваль Церковных Хорів в Креници – фотореляция (фот. Петро Басалыґа)

Недавно в новинах радия Лем.фм заявляли сме о Медженародным Фестівали Церковных Хорів, котрий циклично проходит в середині літа в Креници, а уж пришол час, коли можеме го лем добрі споминати. Была то 7. едиция фестівалю, котрий тішыт ся великом популярністю і успішно вписал ся в ґрафік постійных культуральных акций курортного міста Крениця.

В минулу неділю, 15. липця/юлия 2018 р., в креницкій православній веркви св. Владиміра запрезентувало ся пят хорів. Концерт традицийно по ґаздівскы зачал місцевий парохіяльний хор, ведений Петром Трохановскым. Посеред запрошеных гостюючых мішаных і єднорідных хорів были хоры з Сербіі, Болгариі і Підляша. Такє сопоставліня дає можніст присутному, часто перший раз стоячому в церкви, слухачови видіти великє богаство сакральной творчости, котра своім стильом, темпераментом, ритміком і мельодиком може ся дочыста розходити, вказуючы при так обшырным діяпазоні спільноту в ріжнорідности.

Окрем місцевого хору, зо своім проґрамом выступили: хор парохіі Вознесіня Господнього з Орішкова (Підляша, Польща), Церковний Хор свв. Йоакыма і Анны (Обреновац, Сербія), Перший Болгарскій Хор «Янко Мустаков» (Свіштов, Болгария) і Хор св. Юрия православной парохіі св. Тройці (Парацін, Сербія). В іх репертуарі, попри творах великых композиторів, мож было почути і традицийны старорускы, грецкы балканьскы напівы, меньше знаны на нашых землях. До берегів выполнена креницка святыня зас вказала прибывшым до храму велику кількіст якістной церковной музычной культуры на найвысшым рівни. Вшытко тото завершат ся в головній ціли фестівалю, т.є пропаґувати церковну музыку. Завдякы тому мож посмакувати творчіст представлену в ріжний спосіб – знану в нас, смакуючы при тій нагоді другы музычны традициі.

Концерт был ведений креницкым парохом о. Петром Пупчыком та дириґентом Петром Трохановскым. На концерті не бракло бургомайстра Крениці – др Дариюша Реська, котрий враз з парохом вручал символичны памяткы для участників.

Мы приносиме Вам фотореляцию од выдатного креницкого фотоґрафіка Петра Басалыґы – щыро дякуєме за присланы знимкы.