Медайлу презідента Словацькой републікы дістала Марька Мачошкова

Презідентка Словацькой републікы уділила в неділю 8-го мая 2022-го року в будові Словацькой філгармонії в Братіславі державны нагороды 25-ом особностям общественного, културного і шпортового жывота. Шість з того in memoriam.

Державны нагороды вручали ся з нагоды 29-ой річніці выникнутя Словацькой републікы, но і тот рік не могла церемонія проходити в януаровім терміні з пирчіны пандемічной сітуації.

Меджі оціненыма особностями є і Марія Мачошкова, перша дама русиньской народной співанкы. Презідентка нашу Марьку Мачошкову оцінила Медайлов презідента Словацькой републікы за вызначны заслугы о розвиток Словацькой републікы в области културы.

Марька Мачошкова

Народила ся Марія Мачошкова 30-го марца 1940-го року в русиньскім селі Потічкы, в окресі Стропків. Належыть ку найвызначнішым особностям културного жывота Русинів на Словакії. Нихто їй не повість іншак, як Марька.

Выростала в нелегкых войновых і повойновых роках. Любов ку співу чула уж од дітинства, і то, як соминать, вдяка своїй мамі, котра мала красный голос. Пак їй талент підхопили в школі.

Як молоде дівча у 1956-ім по конкурзі наступила до новооснованого Піддуляньского україньского народного ансамблю (днесь Піддукляньскый умелецькый людовый субор), котрый быв втогды балетом і оперетов Україньского націоналного театру (днесь русиньскый Театер Александра Духновіча). В ансамблі співала 42 років.

З тым умелецькым тілесом перешла цілый світ, абсолвовала стовкы выступлінь. Їй спів, їй презентація нашого фолклору могла публіка видіти на сценах од Тунісії через Голандію, Данію, Німецько аж по Споєны штаты Америкы, Канаду і бывшый Совітьскый союз.

У 1985-ім році здобыла тітул залуженый умелець. Зробила велике множество награнь, включно профіловых албумів, співпрацовала і з іншыма тілесами, наприклад з Бырняньскым радіовым орхестром народных інштрументів – BROLN.

Хоць стала успішнов і знамов співачков, Марька Мачошкова цілый жывот зістала скромным і покорным, а головно добрым чоловіком. При споминах на своє дітинство бісідує, же біда і їджіня з єдной мискы вєдно із сородниками єй выховали ку скромности і співналежности.

Потішуючім фактом є, же у Марькы Мачошковой вік не грає жадну роль. Актівна є доднесь, мож єй видіти на різных културных подіях, фестівалах, де все потішыть публіку. Хоць остатні два рокы такым подіям барз не жычіли, уж теперь рихтує Марька Мачошкова концерты, котры мали одбыти ся іщі перед двома роками ку їй жывотному юбілєю.

Медайла презідента Словацькой републікы

Медайла презідента Словацькой републікы є єднов із державных нагород Словацькой републікы.

Уділює ся гражданам Словацькой републікы, котры вызначно заслужыли ся о ряджіня і справованя державы, о розвиток в области обороны і безпечности Словацькой републікы, господарьства Словацькой републікы, теріторіалной самосправы, наукы і технікы, културы, уменя, шпорту і в соціалній области або за вызначне пошырьованя доброго мена Словацькой републікы.

Належыть і тым, котры з насаджіньом властного жывота заслужыли ся о уратованя людьского жывота або уратованя значных матеріалных цінностей. Вынятково уділює ся і гражданам іншых держав.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА