Маршалківскій Уряд споможе Пут Деревяной Архітектуры

Маршалківскій Уряд Малопольского Воєвідства споможе фінансово Пут Деревяной Архітектуры. To добра віст, беручы до увагы анонс з початку місяця, в якым Малопольска Туристична Орґанізация подавала, што з причыны стриманя середків од воєвідскых власти обєкты з пути не будут доступны про туристів.

В писмі датуваным на 7. червця/юнія 2019 р., направленым на опікунів обєктів будучых частю Пути Деревяной Архітектуры, презес МТО, Ґжеґож Бєдронь, писал, што Самоуряд Малопольского Воєвідства в звязку з формально-орґанізацийныма трудностями рішыл не передавати додатковых середків на проєкт «Одкрытый Пут Деревяной Архітектуры». Дальше презес подавал, што причынит ся тото до стриманя реалізациі проєкту. Наслідством мало быти закрытя деревяных обєктів. До кінця рока одкрыты мали бы быти лем тоты обєкты, котры находят ся на Списку Світовой Спадковины Юнеско.

Тепер обставины ся поправили. Воєвідство дофінансує МТО квотом 700 тис. зл, завдякы чому можливый буде дальшый розвиток Пути Деревяной Архітектуры. Як про «Краківску Ґазету» реляцийонувал Ґ. Бєдронь, признаны грошы сут ратунком для проєкту. Проблем з фінансуваньом ПДА бере ся з факту, што проєкт не має заплянуваного вельорічного буджету на його реалізацию. Власти МТО каждый рік мусят старати ся о ґранты на орґанізацию задач, одрытя храмів і зрыхтуваня опікунів, якы цілый рік сут доступны про туристів. МТО лем того рока, з помочом малопольского воєвідства, на ПДА перезначыла 1 млн 200 тис. зл. Завдякы дофінансуваню одкрытых буде більше церкви і костелів, не лем тоты зо списку Юнеско. Заряд Малопольского Воєвіства фурт аналізує проблем, штобы довести до забезпечыня фінансуваня проєкту на долше.

Презес МТО звертат увагу, же хоц Малопольща єст реґіоном полным туристичных атракций, єй власти за мало середків передают на промоцию, головно тоту за границьом. МТО фурт рыхтує новы проєкты. Єдным з них єст будова обєктів малой архітектуры.

Пут Деревяной Архітектуры был основаный в 2001 році за ініциятивом Малопольского Воєвідства. Причысленых єст до него 49 церкви, 125 костелів, 30 інчого рода будинків, 23 забудовы, 16 музеів та 9 скансенів. Нa офіцияльным сайті Пути Деревяной Архітектуры явила ся листа одкрытых обєктів доступных для туристів в рамках проєкту «Одкрытый Пут Деревяной Архітектуры». Близко половина з них то лемківскы церкви. Обєкты одкрыты сут кажду пятницю і суботу од 9.00 до 18.00 год. та кажду неділю од 12.00 до 17.00 год.