Марийоля Абкович покликана на Полномічника Нижньошлезского Воєводы дс. меншын

Нижньошлезскій Воєвода покликал нового Полномічника до Справ Нацийональных і Етнічных Меншын. З дньом 3. січня/януара 2025 р. на тото становиско была покликана Марийоля Абкович, діячка караімского середовиска в Польщы, од років заанґажувана в справы нацийональных меншын в Польщы.

Абкович на тій функциі заступит дотеперішнього полномічника, Войцєха Скжыпчыка. До головных зачад полномічника належыт м.ін. координуваня на обшыри воєвідства діянь орґанів урядовой адміністрациі реализуючых задачы для нацийональных і етнічных меншын ци підниманя діянь для респектуваня меншыновых прав і протидіяня дискримінациі меншын. Полномічник спілдіє в тій ціли з орґанами територияльного самоуряду і соспільныма орґанізациями, особливо з орґанізациями нацийональных і етнічных меншын та опініює проґрамы для тых меншын, як і для захованя і розвитку реґіонального языка на обшыри нижньошлезского воєвідства.

Марийоля Абкович то Вроцлавянка. Єст Караімком – походит з караімской родины о богатых традициях. Як соспільна активістка діє для караімской меншыны, яка – подібні як Лемкы – подля польского законодавства є етнічном меншыном. Нова полномічна єст авторком науковых і популярнонауковых публикаций караімской темы, выкладат в Інституті Орєнталистикы Выділу Неофілолоґіі Універистету ім. Адама Міцкєвича в Познані.

Знає проблемы, з якыма наштоден стрічают ся нацийональны і етнічны меншыны в Польщы. Абкович од двадцетьох років єст членкыньом Спільной Комісиі Уряду та Нацийональных і Етнічных Меншын. Од 1997 р. веде Звязок Польскых Караімів. Окрем інчого, од 2009 р. єст ведучом Порозумліня о спілпрацы позаурядовых орґанізаций, підметів і фізичных осіб для нацийональных і етнічных меншын під назвом «Калейдоскоп Культур». Як шефредакторка одповідат за выдаваня квартальника караімской меншыны – «Awazymyz».