Маляр, котрий соцреалізму не підпорил

Од 30 липця до 30 вересня т.р., в Выгорлятскым Музею в Гуменным буде мож позерати на експозицию образів вызначного русиньского творцю – Адальберта Войтеха Борецкого.

Адальберт Войтех Борецкій народил ся 14. листопада 1910 рока в Убли, в снинскым окресі. Малювати вчыл го найперше отец. Потім пішол до ґімназиі в недалекым Ужгороді (1920-1927), скінчыл учытельску семінарию в 1931 р. і вечерню, артистычну ужгородску школу в 1932 р. Секретів малярского варштату вчыли го вызначны артисты Адальберт Ерделі, Осиф Бокшай і Еміліян Грабовскій. Дале учытелювал в русиньскых селах на Підкарпатскій Руси – в Королеві і Великій Копани під Хустом і Великым Бычкові недалеко Рахова.

Од 1931 рока зачал діяти в Стоваришыню Артистів Підкарпатской Руси. Вчас студий в воєнній школі в Пардубицях в Чехах познал клясычне чешскє малярство. Малювал головні гірскы краєвиды, карпатскы полонины, або тематычны композициі, образуючы жытя селян. По войні його родина оселила ся в Кошыцях. А сам А. Борецкій остал в Ужгороді. Не погодил ся з соцреалістычном естетыком, обовязуючом на Совітскій Украіні. Перестал учытелювати, был незалежным творцьом. На Украіні не міг выставляти своіх образів. В 1964 році подарило ся му вернути до Чехословацкой Республикы. Вмер 12. червця 1990 рока в Кошыцях. Його працы мож найти в чысленных музейных колекциях.