Малопольскы Пути Желізницьовой Туристыкы

Любителі желізниці будут мати того рока неєдну нагоду, жебы превезти ся історычным табором з паровозом і забытковыма ваґонами на выбраным фраґменті Ґаліцийской Трансверсальной Желізниці на обшыри малопольского воєвідства. Вшытко за справом проєкту Малопольскы Пути Желізницьовой Туристыкы, реалізуваным Новосандецкым Стоваришыньом Любителів Желізниці.

Стоваришыня од 2011 рока занимат ся орґанізацийом переіздів історычныма потягами путьом бывшой Ґаліцийской Трансверсальной Желізниці на одтинку з Нового Санча до Хабівкы. Траса тота є постерігана єст як єдна з найкрасшых в Польщы і в Европі, кєд іде о трасу Ґаліцийской Трансверсальной Желізниці. Інавґурация проєкту одбыла ся уж 5. липця. Товды то, ретро-потяг переіхал першу тогорічну трасу Новий Санч-Касіна Велика. Окрем той трасы, заплянувано іщы 8 інчых, серед котрых нас найбарже буде інтересувала траса 6. вересня: Новий Санч-Крениця Паровозом через Долину Попраду. Буде она вела вздолж рікы Попрад, в другым єй одтинку цілком през Лемковину – селами Верхомля, Зубрик, Андриівка. Кінцьовым єй одтинком єст фраґмент Мушына-Крениця. Тому получыню посвячений был єден з проґрамів Реґістер Забытків, можете го одслухати в нашых радийовых подкастах за тым мотузком.

Партнером проєкту єст Скансен Істориі Желізниці в Хабівці, якій забезпечат ваґоны, паровозы і обслугу. Вчас переіздів передвиджено вельо додатковых подій, м.ін. звиджаня місцевых туристычных атракций, пероновы пікнікы, выступы музычных ансамблів, ци історычны реконструкциі. Пасажерам товаришыти будут акторы-аніматоры, преоблечены в фахы пасажерів минулой епохы – будут гандлярі, Жыдыи, музыканты, богачы з міста і жытелі ґаліийскых сел.

Про докладны описы трас з атракциями зазерайте на сторону проєтку kolejegalicyjskie.pl, якы являт ся гын 30. липця. Од того дня буде тіж можлива резервация білетів през інтернет.

Реалізатором проєкту єст Новосандецкє Стоваришыня Любителів Желізниці завдякы фінансуваню Малопольского Воєвідства.

фот. за: kolejegalicyjskie.pl