Малопольскє Село Пахнуче Зілями – фестин в Высові

Того рока Высова зас стане ся на пару дни найбарже пахнучым селом на Лемковині. В днях 4.-5. липця буде проходил гын фестин Малопольскє Село Пахнуче Зілями, якій з рока на рік тішыт ся што раз то більшым заінтересуваньом.

Туристы та любителі зіля з цілой обшыри будут мочы і того рока прислухати ся прелекциям про зілярскы темы, пошырити домашню аптечку і придбати собі новы свіжы та сушены зіля. Окрем того, будут іщы стоіска з рукоділами і вельо інчых атракций: конкурс на найкрасший вінок з зіля і квітя, артистычны выступы (з лемківскыма співанками запрезентує ся хор Зоря і Роса з Устя Ґорлицкого), танцувальна забава і ріжны показы.

Дрібниці і проґрам найдете на афішы пониже.