Малопольске воєводство поможе ПСК по землетрясіню сумов 225 тісяч евр

Октоброве землетрясіня на выході Словакії запричінило великы шкоды. Черезгранічный партнер Пряшівского самосправного краю (ПСК) – Малопольске воєводство, вырішыв помочі. Із свого бюджету воєводство выділилио суму єден міліон злотых, што є приблизно 225 тісяч евр.

Малопольске воєводство має з ПСК довгодобу співпрацу і тоту суму подарує партнерови на Словакії як прояв солідарности. Інформовала о тім Леа Леготьска з Одділіня комунікації ПСК.

Грошы край схоснує на оправу землетрясіньом пошкодженой інфраштруктуры драг. Конкретно на часть драгы ІІІ. класы меджі селами Токаїк і Дяпаловці, котра была в епіцентрі землетрясіня, і актуално є в гаварійнім стані.

„Дуже собі ціню промптну реакцію нашого польского партнера, котрый нам поміг при одстороніню наслідків той ничівой природной катастрофы. Тото щедре ґесто з боку Малопольского воєводства є лем потверджіньом знамой фразы, в нужді познаш приятеля. Дарованы фінанції будуть добрі схоснованы,“ повів председа ПСК Мілан Маєрьскый.

Малопольске воєводство выділило єден міліон злотых із свого бюджету на тот рік, зато їх ПСК мусить схосновати до 31-го децембра 2023-го року.

„Думали сьме над веце алтернатівами схоснованя тых фінанчных средств. Но кедьже їх схоснованя є вязане до кінця того року, по провіріню леґіслатівных і адміністратівных діл сьме по взаємнім договорі з польсков сторонов вырішыли тоты фінанції схосновати на реконштрукцію пошкодженой інфраштруктуры. Драгы суть максімално важны, і люди з той теріторії потребують безпечне і достпуне перепоїня,“ доповнив Маєрьскый.