Маланка в Ґладышові

Ближыт ся конец рока, ци то за григорияньскым ци за юлияньскым календарьом, люде орґанізуют ся, жебы попращати ся зо старым і привитати новий рік. Перед парома днями інформували сме про такы забавы на Пряшівскій Руси і на Лемковині.

Кєд іде о Лемковину, то не лем перед Маґуром будут малянкувати, але і за ньом. І хоц зима все там міцнійше і долше тримат, то орґанізаторы надіют ся, же сніг і мороз никого в хыжы не притримат. Хочеме, жебы люде, котры жыют по тій страні Маґуры, не мусіли ниґде далеко іхати, жебы мали нагоду, жебы ся зыйти, жебы могли погуляти, посідити разом, не позерати, як хто позбераний, але добрі ся разом бавити. Не на заробок тото робиме, а для люди – бесідує Меля Переґрим зо Смереківця, спілорґанізаторка і ініцияторка маланкы в Ґладышові.

Маланка буде проходила в сельскій світлици в Ґладышові з 13. на 14. січня/януара 2017 р. Початок 19.00 год. В ціні білету (100 зл) сут три горячы стравы, роблены на свіжо, на місци, дакы закускы і напиткы, а до танця буде пригривала капеля Призмат. Хоц то польскій ансамбль, то знают і грают вельо нашых співанок, зато вкажме як ся Лемкы знают бавити! – заохочат Меля Переґрим, яка окрем загальной орґанізациі, одповідат тіж за смак рыхтуваных страв.

Забава передвиджена єст на 100 осіб, записаных єст уж більше 40, зато треба резервувати місце чым скорше, найліпше задзвонити під нр: +48 691 243 018 (Меля Переґрим).