Маланка, то жена!

Ци чули сте даколи звіданя, “де ідеш на нашого Сильвестра”? Так поставлене звіданя мат в собі дві хыбы. Неє в нас Сильвестра, зато одраз знаме – він не наш. Окрем того то “він”, а мы можеме быти гордыма, же наша Маланка, остатній ден Старого Рока, то “она” – жена! Друга хыба, то сам придавник наш/наша. Може і за часто называме деякы подіі нашыма. Гей, бо так ся приняло, але забываме, же русиньскій/лемківскій – все наш. А речений наш, не все русиньскій. І на тым конец патетычного повчуваня в послідній ден 2014 рока. 🙂

Тот ден названий єст од выпадаючого 31. грудня праздника св. Меляніі Римлянкы, славленой і в католицкій, і в православній Церквах (нар. 383 р.-вм. 31. грудня 439 р. в Єрусалимі), зато сміло поздравляме вшыткы Меляніі, Мелі і Мелькы, тым більше, же посеред актывных любителів лем.фм находят ся тіж жены о тым преславным імени.

Як то єст, же аж під конец рока, коли зачынат ся Филипівка, ждеме Різдвяных Свят і зачынаме думати, як проведеме послідній ден рока, роздумуєме – “але злетіл тот рік”. На тото прийде час заран, коли будеме одпочывати по гуляню на чысленных Маланках. Єдны з Вас підут на орґанізуваны з оркєстром і стравом балі, інчы останут на домашній гостині. Сут і такы, котри при телевізорі, або звуках радия лем.фм сядут сой спокійні в фотели при лямпочці вина, жебы о пілночы отворити шампана і привитати Новий Рік.

Вшыткым желаме щесливо провести тот час, дякуючы за Вашу присутніст на портали лем.фм в 2014 році.

А заран будеме сой желати вшыткого доброго в Новым Році 2015!